Browsing "Nechemia"
Mar 20, 2013 - Nechemia    No Comments

Nechemia 7:8

Play

ח בְּנֵי פַרְעֹשׁ–אַלְפַּיִם, מֵאָה וְשִׁבְעִים וּשְׁנָיִם.  {ס}

ט בְּנֵי שְׁפַטְיָה, שְׁלֹשׁ מֵאוֹת שִׁבְעִים וּשְׁנָיִם.  {ס}

י בְּנֵי אָרַח, שֵׁשׁ מֵאוֹת חֲמִשִּׁים וּשְׁנָיִם.  {ס}

יא בְּנֵי-פַחַת מוֹאָב לִבְנֵי יֵשׁוּעַ, וְיוֹאָב–אַלְפַּיִם, וּשְׁמֹנֶה מֵאוֹת שְׁמֹנָה עָשָׂר.  {ס}

יב בְּנֵי עֵילָם–אֶלֶף, מָאתַיִם חֲמִשִּׁים וְאַרְבָּעָה.  {ס}

יג בְּנֵי זַתּוּא, שְׁמֹנֶה מֵאוֹת אַרְבָּעִים וַחֲמִשָּׁה.  {ס}

יד בְּנֵי זַכָּי, שְׁבַע מֵאוֹת וְשִׁשִּׁים.  {ס}

טו בְּנֵי בִנּוּי, שֵׁשׁ מֵאוֹת אַרְבָּעִים וּשְׁמֹנָה.  {ס}

טז בְּנֵי בֵבָי, שֵׁשׁ מֵאוֹת עֶשְׂרִים וּשְׁמֹנָה.  {ס}

יז בְּנֵי עַזְגָּד–אַלְפַּיִם, שְׁלֹשׁ מֵאוֹת עֶשְׂרִים וּשְׁנָיִם.  {ס}

יח בְּנֵי, אֲדֹנִיקָם–שֵׁשׁ מֵאוֹת, שִׁשִּׁים וְשִׁבְעָה.  {ס}

יט בְּנֵי בִגְוָי, אַלְפַּיִם שִׁשִּׁים וְשִׁבְעָה.  {ס}

כ בְּנֵי עָדִין, שֵׁשׁ מֵאוֹת חֲמִשִּׁים וַחֲמִשָּׁה.  {ס}

כא בְּנֵי-אָטֵר לְחִזְקִיָּה, תִּשְׁעִים וּשְׁמֹנָה.  {ס}

כב בְּנֵי חָשֻׁם, שְׁלֹשׁ מֵאוֹת עֶשְׂרִים וּשְׁמֹנָה.  {ס}

כג בְּנֵי בֵצָי, שְׁלֹשׁ מֵאוֹת עֶשְׂרִים וְאַרְבָּעָה.  {ס}

כד בְּנֵי חָרִיף, מֵאָה שְׁנֵים עָשָׂר.  {ס}

כה בְּנֵי גִבְעוֹן, תִּשְׁעִים וַחֲמִשָּׁה.  {ס}

כו אַנְשֵׁי בֵית-לֶחֶם וּנְטֹפָה, מֵאָה שְׁמֹנִים וּשְׁמֹנָה.  {ס}

כז אַנְשֵׁי עֲנָתוֹת, מֵאָה עֶשְׂרִים וּשְׁמֹנָה.  {ס}

כח אַנְשֵׁי בֵית-עַזְמָוֶת, אַרְבָּעִים וּשְׁנָיִם.  {ס}

כט אַנְשֵׁי קִרְיַת יְעָרִים כְּפִירָה וּבְאֵרוֹת, שְׁבַע מֵאוֹת אַרְבָּעִים וּשְׁלֹשָׁה.  {ס}

ל אַנְשֵׁי הָרָמָה וָגָבַע, שֵׁשׁ מֵאוֹת עֶשְׂרִים וְאֶחָד.  {ס}

לא אַנְשֵׁי מִכְמָס, מֵאָה וְעֶשְׂרִים וּשְׁנָיִם.  {ס}

לב אַנְשֵׁי בֵית-אֵל וְהָעָי, מֵאָה עֶשְׂרִים וּשְׁלֹשָׁה.  {ס}

לג אַנְשֵׁי נְבוֹ אַחֵר, חֲמִשִּׁים וּשְׁנָיִם.  {ס}

לד בְּנֵי, עֵילָם אַחֵר–אֶלֶף, מָאתַיִם חֲמִשִּׁים וְאַרְבָּעָה.  {ס}

לה בְּנֵי חָרִם, שְׁלֹשׁ מֵאוֹת וְעֶשְׂרִים.  {ס}

לו בְּנֵי יְרֵחוֹ, שְׁלֹשׁ מֵאוֹת אַרְבָּעִים וַחֲמִשָּׁה.  {ס}

לז בְּנֵי-לֹד חָדִיד וְאֹנוֹ, שְׁבַע מֵאוֹת וְעֶשְׂרִים וְאֶחָד.  {ס}

לח בְּנֵי סְנָאָה–שְׁלֹשֶׁת אֲלָפִים, תְּשַׁע מֵאוֹת וּשְׁלֹשִׁים.  {פ}

לט הַכֹּהֲנִים:  בְּנֵי יְדַעְיָה לְבֵית יֵשׁוּעַ, תְּשַׁע מֵאוֹת שִׁבְעִים וּשְׁלֹשָׁה.  {ס}

מ בְּנֵי אִמֵּר, אֶלֶף חֲמִשִּׁים וּשְׁנָיִם.  {ס}

מא בְּנֵי פַשְׁחוּר–אֶלֶף, מָאתַיִם אַרְבָּעִים וְשִׁבְעָה.  {ס}

מב בְּנֵי חָרִם, אֶלֶף שִׁבְעָה עָשָׂר.  {פ}

מג הַלְוִיִּם:  בְּנֵי-יֵשׁוּעַ לְקַדְמִיאֵל לִבְנֵי לְהוֹדְוָה, שִׁבְעִים וְאַרְבָּעָה.  {ס}

מד הַמְשֹׁרְרִים–בְּנֵי אָסָף, מֵאָה אַרְבָּעִים וּשְׁמֹנָה.  {ס}

מה הַשֹּׁעֲרִים, בְּנֵי-שַׁלֻּם בְּנֵי-אָטֵר בְּנֵי-טַלְמֹן בְּנֵי-עַקּוּב, בְּנֵי חֲטִיטָא, בְּנֵי שֹׁבָי–מֵאָה, שְׁלֹשִׁים וּשְׁמֹנָה.  {ס} 

Mar 19, 2013 - Nechemia    No Comments

Nechemia 7:1

Play

א וַיְהִי, כַּאֲשֶׁר נִבְנְתָה הַחוֹמָה, וָאַעֲמִיד, הַדְּלָתוֹת; וַיִּפָּקְדוּ הַשּׁוֹעֲרִים וְהַמְשֹׁרְרִים, וְהַלְוִיִּם.

ב וָאֲצַוֶּה אֶת-חֲנָנִי אָחִי, וְאֶת-חֲנַנְיָה שַׂר הַבִּירָה–עַל-יְרוּשָׁלִָם:  כִּי-הוּא כְּאִישׁ אֱמֶת, וְיָרֵא אֶת-הָאֱלֹהִים מֵרַבִּים.

ג ויאמר (וָאֹמַר) לָהֶם, לֹא יִפָּתְחוּ שַׁעֲרֵי יְרוּשָׁלִַם עַד-חֹם הַשֶּׁמֶשׁ, וְעַד הֵם עֹמְדִים יָגִיפוּ הַדְּלָתוֹת, וֶאֱחֹזוּ; וְהַעֲמֵיד, מִשְׁמְרוֹת יֹשְׁבֵי יְרוּשָׁלִַם–אִישׁ בְּמִשְׁמָרוֹ, וְאִישׁ נֶגֶד בֵּיתוֹ. 

ד וְהָעִיר רַחֲבַת יָדַיִם, וּגְדֹלָה, וְהָעָם מְעַט, בְּתוֹכָהּ; וְאֵין בָּתִּים, בְּנוּיִם.

ה וַיִּתֵּן אֱלֹהַי אֶל-לִבִּי, וָאֶקְבְּצָה אֶת-הַחֹרִים וְאֶת-הַסְּגָנִים וְאֶת-הָעָם לְהִתְיַחֵשׂ; וָאֶמְצָא, סֵפֶר הַיַּחַשׂ הָעוֹלִים בָּרִאשׁוֹנָה, וָאֶמְצָא, כָּתוּב בּוֹ.  {פ}

ו אֵלֶּה בְּנֵי הַמְּדִינָה, הָעֹלִים מִשְּׁבִי הַגּוֹלָה, אֲשֶׁר הֶגְלָה, נְבוּכַדְנֶצַּר מֶלֶךְ בָּבֶל; וַיָּשׁוּבוּ לִירוּשָׁלִַם וְלִיהוּדָה, אִישׁ לְעִירוֹ.

ז הַבָּאִים עִם-זְרֻבָּבֶל, יֵשׁוּעַ נְחֶמְיָה עֲזַרְיָה רַעַמְיָה נַחֲמָנִי מָרְדֳּכַי בִּלְשָׁן מִסְפֶּרֶת בִּגְוַי–נְחוּם בַּעֲנָה:  מִסְפַּר, אַנְשֵׁי עַם יִשְׂרָאֵל.  {ס}

Mar 18, 2013 - Nechemia    No Comments

Nechemia 6:13

Play

יג לְמַעַן שָׂכוּר הוּא, לְמַעַן-אִירָא וְאֶעֱשֶׂה-כֵּן וְחָטָאתִי; וְהָיָה לָהֶם לְשֵׁם רָע, לְמַעַן יְחָרְפוּנִי.  {פ}

יד זָכְרָה אֱלֹהַי לְטוֹבִיָּה וּלְסַנְבַלַּט, כְּמַעֲשָׂיו אֵלֶּה; וְגַם לְנוֹעַדְיָה הַנְּבִיאָה וּלְיֶתֶר הַנְּבִיאִים, אֲשֶׁר הָיוּ מְיָרְאִים אוֹתִי.

טו וַתִּשְׁלַם, הַחוֹמָה, בְּעֶשְׂרִים וַחֲמִשָּׁה, לֶאֱלוּל–לַחֲמִשִּׁים וּשְׁנַיִם, יוֹם.  {פ}

טז וַיְהִי, כַּאֲשֶׁר שָׁמְעוּ כָּל-אוֹיְבֵינוּ, וַיִּרְאוּ כָּל-הַגּוֹיִם אֲשֶׁר סְבִיבֹתֵינוּ, וַיִּפְּלוּ מְאֹד בְּעֵינֵיהֶם; וַיֵּדְעוּ–כִּי מֵאֵת אֱלֹהֵינוּ, נֶעֶשְׂתָה הַמְּלָאכָה הַזֹּאת.

יז גַּם בַּיָּמִים הָהֵם, מַרְבִּים חֹרֵי יְהוּדָה אִגְּרֹתֵיהֶם, הוֹלְכוֹת, עַל-טוֹבִיָּה; וַאֲשֶׁר לְטוֹבִיָּה, בָּאוֹת אֲלֵיהֶם.

יח כִּי-רַבִּים בִּיהוּדָה, בַּעֲלֵי שְׁבוּעָה לוֹ–כִּי-חָתָן הוּא, לִשְׁכַנְיָה בֶן-אָרַח; וִיהוֹחָנָן בְּנוֹ–לָקַח, אֶת-בַּת-מְשֻׁלָּם בֶּן בֶּרֶכְיָה.

יט גַּם טוֹבֹתָיו, הָיוּ אֹמְרִים לְפָנַי, וּדְבָרַי, הָיוּ מוֹצִיאִים לוֹ; אִגְּרוֹת שָׁלַח טוֹבִיָּה, לְיָרְאֵנִי.

Mar 15, 2013 - Nechemia    No Comments

Nechemia 6:8

Play

ח וָאֶשְׁלְחָה אֵלָיו, לֵאמֹר–לֹא נִהְיָה כַּדְּבָרִים הָאֵלֶּה, אֲשֶׁר אַתָּה אוֹמֵר:  כִּי מִלִּבְּךָ, אַתָּה בוֹדָאם.

ט כִּי כֻלָּם, מְיָרְאִים אוֹתָנוּ לֵאמֹר, יִרְפּוּ יְדֵיהֶם מִן-הַמְּלָאכָה, וְלֹא תֵעָשֶׂה; וְעַתָּה, חַזֵּק אֶת-יָדָי. 

י וַאֲנִי-בָאתִי, בֵּית שְׁמַעְיָה בֶן-דְּלָיָה בֶּן-מְהֵיטַבְאֵל–וְהוּא עָצוּר; וַיֹּאמֶר נִוָּעֵד אֶל-בֵּית הָאֱלֹהִים אֶל-תּוֹךְ הַהֵיכָל, וְנִסְגְּרָה דַּלְתוֹת הַהֵיכָל–כִּי בָּאִים לְהָרְגֶךָ, וְלַיְלָה בָּאִים לְהָרְגֶךָ.

יא וָאֹמְרָה, הַאִישׁ כָּמוֹנִי יִבְרָח, וּמִי כָמוֹנִי אֲשֶׁר-יָבֹא אֶל-הַהֵיכָל, וָחָי; לֹא, אָבוֹא.

יב וָאַכִּירָה, וְהִנֵּה לֹא-אֱלֹהִים שְׁלָחוֹ:  כִּי הַנְּבוּאָה דִּבֶּר עָלַי, וְטוֹבִיָּה וְסַנְבַלַּט שְׂכָרוֹ.

Mar 14, 2013 - Nechemia    No Comments

Nechemia 6:1

Play

א וַיְהִי כַאֲשֶׁר נִשְׁמַע לְסַנְבַלַּט וְטוֹבִיָּה וּלְגֶשֶׁם הָעַרְבִי וּלְיֶתֶר אֹיְבֵינוּ, כִּי בָנִיתִי אֶת-הַחוֹמָה, וְלֹא-נוֹתַר בָּהּ, פָּרֶץ–גַּם עַד-הָעֵת הַהִיא, דְּלָתוֹת לֹא-הֶעֱמַדְתִּי בַשְּׁעָרִים.

ב וַיִּשְׁלַח סַנְבַלַּט וְגֶשֶׁם אֵלַי לֵאמֹר, לְכָה וְנִוָּעֲדָה יַחְדָּו בַּכְּפִירִים בְּבִקְעַת אוֹנוֹ; וְהֵמָּה, חֹשְׁבִים, לַעֲשׂוֹת לִי, רָעָה.

ג וָאֶשְׁלְחָה עֲלֵיהֶם מַלְאָכִים, לֵאמֹר–מְלָאכָה גְדוֹלָה אֲנִי עֹשֶׂה, וְלֹא אוּכַל לָרֶדֶת; לָמָּה תִשְׁבַּת הַמְּלָאכָה כַּאֲשֶׁר אַרְפֶּהָ, וְיָרַדְתִּי אֲלֵיכֶם.

ד וַיִּשְׁלְחוּ אֵלַי כַּדָּבָר הַזֶּה, אַרְבַּע פְּעָמִים; וָאָשִׁיב אוֹתָם, כַּדָּבָר הַזֶּה.  {ס}

ה וַיִּשְׁלַח אֵלַי סַנְבַלַּט כַּדָּבָר הַזֶּה, פַּעַם חֲמִישִׁית–אֶת-נַעֲרוֹ; וְאִגֶּרֶת פְּתוּחָה, בְּיָדוֹ.

ו כָּתוּב בָּהּ, בַּגּוֹיִם נִשְׁמָע וְגַשְׁמוּ אֹמֵר, אַתָּה וְהַיְּהוּדִים חֹשְׁבִים לִמְרוֹד, עַל-כֵּן אַתָּה בוֹנֶה הַחוֹמָה; וְאַתָּה, הֹוֶה לָהֶם לְמֶלֶךְ–כַּדְּבָרִים, הָאֵלֶּה.

ז וְגַם-נְבִיאִים הֶעֱמַדְתָּ לִקְרֹא עָלֶיךָ בִירוּשָׁלִַם לֵאמֹר, מֶלֶךְ בִּיהוּדָה, וְעַתָּה יִשָּׁמַע לַמֶּלֶךְ, כַּדְּבָרִים הָאֵלֶּה; וְעַתָּה לְכָה, וְנִוָּעֲצָה יַחְדָּו.  {ס}

Mar 13, 2013 - Nechemia    No Comments

Nechemia 5:18

Play

יח וַאֲשֶׁר הָיָה נַעֲשֶׂה לְיוֹם אֶחָד, שׁוֹר אֶחָד צֹאן שֵׁשׁ-בְּרֻרוֹת וְצִפֳּרִים נַעֲשׂוּ-לִי, וּבֵין עֲשֶׂרֶת יָמִים בְּכָל-יַיִן, לְהַרְבֵּה; וְעִם-זֶה, לֶחֶם הַפֶּחָה לֹא בִקַּשְׁתִּי–כִּי-כָבְדָה הָעֲבֹדָה, עַל-הָעָם הַזֶּה.

יט זָכְרָה-לִּי אֱלֹהַי, לְטוֹבָה–כֹּל אֲשֶׁר-עָשִׂיתִי, עַל-הָעָם הַזֶּה.  {פ}

Mar 12, 2013 - Nechemia    No Comments

Nechemia 5:14

Play

יד גַּם מִיּוֹם אֲשֶׁר-צִוָּה אוֹתִי, לִהְיוֹת פֶּחָם בְּאֶרֶץ יְהוּדָה, מִשְּׁנַת עֶשְׂרִים וְעַד שְׁנַת שְׁלֹשִׁים וּשְׁתַּיִם לְאַרְתַּחְשַׁסְתְּא הַמֶּלֶךְ, שָׁנִים שְׁתֵּים עֶשְׂרֵה–אֲנִי וְאַחַי, לֶחֶם הַפֶּחָה לֹא אָכַלְתִּי.

טו וְהַפַּחוֹת הָרִאשֹׁנִים אֲשֶׁר-לְפָנַי הִכְבִּידוּ עַל-הָעָם, וַיִּקְחוּ מֵהֶם בְּלֶחֶם וָיַיִן אַחַר כֶּסֶף-שְׁקָלִים אַרְבָּעִים–גַּם נַעֲרֵיהֶם, שָׁלְטוּ עַל-הָעָם; וַאֲנִי לֹא-עָשִׂיתִי כֵן, מִפְּנֵי יִרְאַת אֱלֹהִים.

טז וְגַם בִּמְלֶאכֶת הַחוֹמָה הַזֹּאת, הֶחֱזַקְתִּי, וְשָׂדֶה, לֹא קָנִינוּ; וְכָל-נְעָרַי–קְבוּצִים שָׁם, עַל-הַמְּלָאכָה.

יז וְהַיְּהוּדִים וְהַסְּגָנִים מֵאָה וַחֲמִשִּׁים אִישׁ, וְהַבָּאִים אֵלֵינוּ מִן-הַגּוֹיִם אֲשֶׁר-סְבִיבֹתֵינוּ–עַל-שֻׁלְחָנִי.

Mar 11, 2013 - Nechemia    No Comments

Nechemia 5:11

Play

יא הָשִׁיבוּ נָא לָהֶם כְּהַיּוֹם, שְׂדֹתֵיהֶם כַּרְמֵיהֶם זֵיתֵיהֶם–וּבָתֵּיהֶם; וּמְאַת הַכֶּסֶף וְהַדָּגָן הַתִּירוֹשׁ וְהַיִּצְהָר, אֲשֶׁר אַתֶּם נֹשִׁים בָּהֶם.

יב וַיֹּאמְרוּ נָשִׁיב, וּמֵהֶם לֹא נְבַקֵּשׁ–כֵּן נַעֲשֶׂה, כַּאֲשֶׁר אַתָּה אוֹמֵר; וָאֶקְרָא, אֶת-הַכֹּהֲנִים, וָאַשְׁבִּיעֵם, לַעֲשׂוֹת כַּדָּבָר הַזֶּה.

יג גַּם-חָצְנִי נָעַרְתִּי, וָאֹמְרָה כָּכָה יְנַעֵר הָאֱלֹהִים אֶת-כָּל-הָאִישׁ אֲשֶׁר לֹא-יָקִים אֶת-הַדָּבָר הַזֶּה מִבֵּיתוֹ וּמִיגִיעוֹ, וְכָכָה יִהְיֶה נָעוּר, וָרֵק; וַיֹּאמְרוּ כָל-הַקָּהָל אָמֵן, וַיְהַלְלוּ אֶת-יְהוָה, וַיַּעַשׂ הָעָם, כַּדָּבָר הַזֶּה.

Mar 8, 2013 - Nechemia    No Comments

Nechemia 5:8

Play

ח וָאֹמְרָה לָהֶם, אֲנַחְנוּ קָנִינוּ אֶת-אַחֵינוּ הַיְּהוּדִים הַנִּמְכָּרִים לַגּוֹיִם כְּדֵי בָנוּ, וְגַם-אַתֶּם תִּמְכְּרוּ אֶת-אֲחֵיכֶם, וְנִמְכְּרוּ-לָנוּ; וַיַּחֲרִישׁוּ, וְלֹא מָצְאוּ דָּבָר.  {ס}

ט ויאמר (וָאֹמַר), לֹא-טוֹב הַדָּבָר אֲשֶׁר-אַתֶּם עֹשִׂים:  הֲלוֹא בְּיִרְאַת אֱלֹהֵינוּ תֵּלֵכוּ, מֵחֶרְפַּת הַגּוֹיִם אוֹיְבֵינוּ.

י וְגַם-אֲנִי אַחַי וּנְעָרַי, נֹשִׁים בָּהֶם כֶּסֶף וְדָגָן; נַעַזְבָה-נָּא, אֶת-הַמַּשָּׁא הַזֶּה.

Mar 7, 2013 - Nechemia    No Comments

Nechemia 5:1

Play

א וַתְּהִי צַעֲקַת הָעָם וּנְשֵׁיהֶם, גְּדוֹלָה, אֶל-אֲחֵיהֶם, הַיְּהוּדִים.

ב וְיֵשׁ אֲשֶׁר אֹמְרִים, בָּנֵינוּ וּבְנֹתֵינוּ אֲנַחְנוּ רַבִּים; וְנִקְחָה דָגָן, וְנֹאכְלָה וְנִחְיֶה.

ג וְיֵשׁ אֲשֶׁר אֹמְרִים, שְׂדֹתֵינוּ וּכְרָמֵינוּ וּבָתֵּינוּ אֲנַחְנוּ עֹרְבִים; וְנִקְחָה דָגָן, בָּרָעָב.

ד וְיֵשׁ אֲשֶׁר אֹמְרִים, לָוִינוּ כֶסֶף לְמִדַּת הַמֶּלֶךְ, שְׂדֹתֵינוּ, וּכְרָמֵינוּ.

ה וְעַתָּה, כִּבְשַׂר אַחֵינוּ בְּשָׂרֵנוּ, כִּבְנֵיהֶם, בָּנֵינוּ; וְהִנֵּה אֲנַחְנוּ כֹבְשִׁים אֶת-בָּנֵינוּ וְאֶת-בְּנֹתֵינוּ לַעֲבָדִים, וְיֵשׁ מִבְּנֹתֵינוּ נִכְבָּשׁוֹת וְאֵין לְאֵל יָדֵנוּ, וּשְׂדֹתֵינוּ וּכְרָמֵינוּ, לַאֲחֵרִים.

ו וַיִּחַר לִי, מְאֹד, כַּאֲשֶׁר שָׁמַעְתִּי אֶת-זַעֲקָתָם, וְאֵת הַדְּבָרִים הָאֵלֶּה.

ז וַיִּמָּלֵךְ לִבִּי עָלַי, וָאָרִיבָה אֶת-הַחֹרִים וְאֶת-הַסְּגָנִים, וָאֹמְרָה לָהֶם, מַשָּׁא אִישׁ-בְּאָחִיו אַתֶּם נשאים (נֹשִׁים); וָאֶתֵּן עֲלֵיהֶם, קְהִלָּה גְדוֹלָה.

ח וָאֹמְרָה לָהֶם, אֲנַחְנוּ קָנִינוּ אֶת-אַחֵינוּ הַיְּהוּדִים הַנִּמְכָּרִים לַגּוֹיִם כְּדֵי בָנוּ, וְגַם-אַתֶּם תִּמְכְּרוּ אֶת-אֲחֵיכֶם, וְנִמְכְּרוּ-לָנוּ; וַיַּחֲרִישׁוּ, וְלֹא מָצְאוּ דָּבָר.  {ס}

Pages:«123456»