Oct 31, 2013 - Divrei Hayamim    No Comments

Divrei Hayamim II 1:1

Play

א וַיִּתְחַזֵּק שְׁלֹמֹה בֶן-דָּוִיד, עַל-מַלְכוּתוֹ; וַיהוָה אֱלֹהָיו עִמּוֹ, וַיְגַדְּלֵהוּ לְמָעְלָה.

ב וַיֹּאמֶר שְׁלֹמֹה לְכָל-יִשְׂרָאֵל לְשָׂרֵי הָאֲלָפִים וְהַמֵּאוֹת וְלַשֹּׁפְטִים, וּלְכֹל נָשִׂיא לְכָל-יִשְׂרָאֵל–רָאשֵׁי הָאָבוֹת.

ג וַיֵּלְכוּ, שְׁלֹמֹה וְכָל-הַקָּהָל עִמּוֹ, לַבָּמָה, אֲשֶׁר בְּגִבְעוֹן:  כִּי-שָׁם הָיָה, אֹהֶל מוֹעֵד הָאֱלֹהִים, אֲשֶׁר עָשָׂה מֹשֶׁה עֶבֶד-יְהוָה, בַּמִּדְבָּר.

ד אֲבָל, אֲרוֹן הָאֱלֹהִים הֶעֱלָה דָוִיד מִקִּרְיַת יְעָרִים, בַּהֵכִין לוֹ, דָּוִיד:  כִּי נָטָה-לוֹ אֹהֶל, בִּירוּשָׁלִָם.

ה וּמִזְבַּח הַנְּחֹשֶׁת, אֲשֶׁר עָשָׂה בְּצַלְאֵל בֶּן-אוּרִי בֶן-חוּר–שָׁם, לִפְנֵי מִשְׁכַּן יְהוָה; וַיִּדְרְשֵׁהוּ שְׁלֹמֹה, וְהַקָּהָל.

ו וַיַּעַל שְׁלֹמֹה שָׁם עַל-מִזְבַּח הַנְּחֹשֶׁת, לִפְנֵי יְהוָה, אֲשֶׁר, לְאֹהֶל מוֹעֵד; וַיַּעַל עָלָיו עֹלוֹת, אָלֶף.

ז בַּלַּיְלָה הַהוּא, נִרְאָה אֱלֹהִים לִשְׁלֹמֹה; וַיֹּאמֶר לוֹ, שְׁאַל מָה אֶתֶּן-לָךְ.

ח וַיֹּאמֶר שְׁלֹמֹה, לֵאלֹהִים, אַתָּה עָשִׂיתָ עִם-דָּוִיד אָבִי, חֶסֶד גָּדוֹל; וְהִמְלַכְתַּנִי, תַּחְתָּיו.

ט עַתָּה, יְהוָה אֱלֹהִים–יֵאָמֵן דְּבָרְךָ, עִם דָּוִיד אָבִי:  כִּי אַתָּה, הִמְלַכְתַּנִי, עַל-עַם, רַב כַּעֲפַר הָאָרֶץ.

י עַתָּה, חָכְמָה וּמַדָּע תֶּן-לִי, וְאֵצְאָה לִפְנֵי הָעָם-הַזֶּה, וְאָבוֹאָה:  כִּי-מִי יִשְׁפֹּט, אֶת-עַמְּךָ הַזֶּה הַגָּדוֹל.  {ס}

יא וַיֹּאמֶר אֱלֹהִים לִשְׁלֹמֹה יַעַן אֲשֶׁר הָיְתָה זֹאת עִם-לְבָבֶךָ, וְלֹא-שָׁאַלְתָּ עֹשֶׁר נְכָסִים וְכָבוֹד וְאֵת נֶפֶשׁ שֹׂנְאֶיךָ, וְגַם-יָמִים רַבִּים, לֹא שָׁאָלְתָּ; וַתִּשְׁאַל-לְךָ, חָכְמָה וּמַדָּע, אֲשֶׁר תִּשְׁפּוֹט אֶת-עַמִּי, אֲשֶׁר הִמְלַכְתִּיךָ עָלָיו.

יב הַחָכְמָה וְהַמַּדָּע, נָתוּן לָךְ; וְעֹשֶׁר וּנְכָסִים וְכָבוֹד, אֶתֶּן-לָךְ–אֲשֶׁר לֹא-הָיָה כֵן לַמְּלָכִים אֲשֶׁר לְפָנֶיךָ, וְאַחֲרֶיךָ לֹא יִהְיֶה-כֵּן.

יג וַיָּבֹא שְׁלֹמֹה לַבָּמָה אֲשֶׁר-בְּגִבְעוֹן, יְרוּשָׁלִַם, מִלִּפְנֵי, אֹהֶל מוֹעֵד; וַיִּמְלֹךְ, עַל-יִשְׂרָאֵל.  {פ}

VN:F [1.9.21_1169]
Rating: 0.0/5 (0 votes cast)