Dec 19, 2013 - Divrei Hayamim    No Comments

Divrei Hayamim II 16:6

Play

ו וְאָסָא הַמֶּלֶךְ, לָקַח אֶת-כָּל-יְהוּדָה, וַיִּשְׂאוּ אֶת-אַבְנֵי הָרָמָה וְאֶת-עֵצֶיהָ, אֲשֶׁר בָּנָה בַּעְשָׁא; וַיִּבֶן בָּהֶם, אֶת-גֶּבַע וְאֶת-הַמִּצְפָּה.  {ס}

ז וּבָעֵת הַהִיא, בָּא חֲנָנִי הָרֹאֶה, אֶל-אָסָא, מֶלֶךְ יְהוּדָה; וַיֹּאמֶר אֵלָיו, בְּהִשָּׁעֶנְךָ עַל-מֶלֶךְ אֲרָם וְלֹא נִשְׁעַנְתָּ עַל-יְהוָה אֱלֹהֶיךָ, עַל-כֵּן נִמְלַט חֵיל מֶלֶךְ-אֲרָם, מִיָּדֶךָ.

ח הֲלֹא הַכּוּשִׁים וְהַלּוּבִים, הָיוּ לְחַיִל לָרֹב לְרֶכֶב וּלְפָרָשִׁים–לְהַרְבֵּה מְאֹד; וּבְהִשָּׁעֶנְךָ עַל-יְהוָה, נְתָנָם בְּיָדֶךָ.

ט כִּי יְהוָה, עֵינָיו מְשֹׁטְטוֹת בְּכָל-הָאָרֶץ לְהִתְחַזֵּק עִם-לְבָבָם שָׁלֵם אֵלָיו–נִסְכַּלְתָּ עַל-זֹאת:  כִּי מֵעַתָּה, יֵשׁ עִמְּךָ מִלְחָמוֹת.

י וַיִּכְעַס אָסָא אֶל-הָרֹאֶה, וַיִּתְּנֵהוּ בֵּית הַמַּהְפֶּכֶת–כִּי-בְזַעַף עִמּוֹ, עַל-זֹאת; וַיְרַצֵּץ אָסָא מִן-הָעָם, בָּעֵת הַהִיא.

יא וְהִנֵּה דִּבְרֵי אָסָא, הָרִאשׁוֹנִים וְהָאַחֲרוֹנִים–הִנָּם כְּתוּבִים עַל-סֵפֶר הַמְּלָכִים, לִיהוּדָה וְיִשְׂרָאֵל.

יב וַיֶּחֱלֶא אָסָא בִּשְׁנַת שְׁלוֹשִׁים וָתֵשַׁע לְמַלְכוּתוֹ בְּרַגְלָיו, עַד-לְמַעְלָה חָלְיוֹ; וְגַם-בְּחָלְיוֹ לֹא-דָרַשׁ אֶת-יְהוָה, כִּי בָּרֹפְאִים.

יג וַיִּשְׁכַּב אָסָא, עִם-אֲבֹתָיו; וַיָּמָת, בִּשְׁנַת אַרְבָּעִים וְאַחַת לְמָלְכוֹ.

יד וַיִּקְבְּרֻהוּ בְקִבְרֹתָיו, אֲשֶׁר כָּרָה-לוֹ בְּעִיר דָּוִיד, וַיַּשְׁכִּיבֻהוּ בַּמִּשְׁכָּב אֲשֶׁר מִלֵּא בְּשָׂמִים וּזְנִים, מְרֻקָּחִים בְּמִרְקַחַת מַעֲשֶׂה; וַיִּשְׂרְפוּ-לוֹ שְׂרֵפָה, גְּדוֹלָה עַד-לִמְאֹד.  {פ}

Got anything to say? Go ahead and leave a comment!