Iyov 19:26
Podcast: Play in new window | Download (Duration: 1:01:11 — 21.0MB)
כו וְאַחַר עוֹרִי, נִקְּפוּ-זֹאת; וּמִבְּשָׂרִי, אֶחֱזֶה אֱלוֹהַּ.
כז אֲשֶׁר אֲנִי, אֶחֱזֶה-לִּי–וְעֵינַי רָאוּ וְלֹא-זָר: כָּלוּ כִלְיֹתַי בְּחֵקִי.
כח כִּי תֹאמְרוּ, מַה-נִּרְדָּף-לוֹ; וְשֹׁרֶשׁ דָּבָר, נִמְצָא-בִי.
כט גּוּרוּ לָכֶם, מִפְּנֵי-חֶרֶב–כִּי-חֵמָה, עֲוֹנוֹת חָרֶב: לְמַעַן תֵּדְעוּן שדין (שַׁדּוּן).
פרק כ
א וַיַּעַן, צֹפַר הַנַּעֲמָתִי; וַיֹּאמַר.
ב לָכֵן, שְׂעִפַּי יְשִׁיבוּנִי; וּבַעֲבוּר, חוּשִׁי בִי.
ג מוּסַר כְּלִמָּתִי אֶשְׁמָע; וְרוּחַ, מִבִּינָתִי יַעֲנֵנִי.
ד הֲזֹאת יָדַעְתָּ, מִנִּי-עַד; מִנִּי שִׂים אָדָם עֲלֵי-אָרֶץ.
ה כִּי רִנְנַת רְשָׁעִים, מִקָּרוֹב; וְשִׂמְחַת חָנֵף עֲדֵי-רָגַע.
ו אִם-יַעֲלֶה לַשָּׁמַיִם שִׂיאוֹ; וְרֹאשׁוֹ, לָעָב יַגִּיעַ.
ז כְּגֶלְלוֹ, לָנֶצַח יֹאבֵד; רֹאָיו, יֹאמְרוּ אַיּוֹ.
ח כַּחֲלוֹם יָעוּף, וְלֹא יִמְצָאֻהוּ; וְיֻדַּד, כְּחֶזְיוֹן לָיְלָה.