Mar 11, 2014 - Iyov    No Comments

Iyov 4:12

Play

יב  וְאֵלַי, דָּבָר יְגֻנָּב;    וַתִּקַּח אָזְנִי, שֵׁמֶץ מֶנְהוּ.

יג  בִּשְׂעִפִּים, מֵחֶזְיֹנוֹת לָיְלָה;    בִּנְפֹל תַּרְדֵּמָה, עַל-אֲנָשִׁים.

יד  פַּחַד קְרָאַנִי, וּרְעָדָה;    וְרֹב עַצְמוֹתַי הִפְחִיד.

טו  וְרוּחַ, עַל-פָּנַי יַחֲלֹף;    תְּסַמֵּר, שַׂעֲרַת בְּשָׂרִי.

טז  יַעֲמֹד, וְלֹא-אַכִּיר מַרְאֵהוּ–    תְּמוּנָה, לְנֶגֶד עֵינָי; דְּמָמָה וָקוֹל    אֶשְׁמָע.

יז  הַאֱנוֹשׁ, מֵאֱלוֹהַּ יִצְדָּק;    אִם מֵעֹשֵׂהוּ, יִטְהַר-גָּבֶר.

יח  הֵן בַּעֲבָדָיו, לֹא יַאֲמִין;    וּבְמַלְאָכָיו, יָשִׂים תָּהֳלָה.

יט  אַף, שֹׁכְנֵי בָתֵּי-חֹמֶר–אֲשֶׁר-בֶּעָפָר יְסוֹדָם:    יְדַכְּאוּם, לִפְנֵי-עָשׁ.

כ  מִבֹּקֶר לָעֶרֶב יֻכַּתּוּ;    מִבְּלִי מֵשִׂים, לָנֶצַח יֹאבֵדוּ.

כא  הֲלֹא-נִסַּע יִתְרָם בָּם;    יָמוּתוּ, וְלֹא בְחָכְמָה.

Got anything to say? Go ahead and leave a comment!