Mar 27, 2014 - Iyov    No Comments

Iyov 8:16

Play

טז  רָטֹב הוּא, לִפְנֵי-שָׁמֶשׁ;    וְעַל גַּנָּתוֹ, יֹנַקְתּוֹ תֵצֵא.

יז  עַל-גַּל, שָׁרָשָׁיו יְסֻבָּכוּ;    בֵּית אֲבָנִים יֶחֱזֶה.

יח  אִם-יְבַלְּעֶנּוּ מִמְּקֹמוֹ;    וְכִחֶשׁ בּוֹ, לֹא רְאִיתִיךָ.

יט  הֶן-הוּא, מְשׂוֹשׂ דַּרְכּוֹ;    וּמֵעָפָר, אַחֵר יִצְמָחוּ.

כ  הֶן-אֵל, לֹא יִמְאַס-תָּם;    וְלֹא-יַחֲזִיק, בְּיַד-מְרֵעִים.

כא  עַד-יְמַלֵּה שְׂחוֹק פִּיךָ;    וּשְׂפָתֶיךָ תְרוּעָה.

כב  שֹׂנְאֶיךָ יִלְבְּשׁוּ-בֹשֶׁת;    וְאֹהֶל רְשָׁעִים אֵינֶנּוּ.

פרק ט

א  וַיַּעַן אִיּוֹב, וַיֹּאמַר.

ב  אָמְנָם, יָדַעְתִּי כִי-כֵן;    וּמַה-יִּצְדַּק אֱנוֹשׁ עִם-אֵל.

ג  אִם-יַחְפֹּץ, לָרִיב עִמּוֹ–    לֹא-יַעֲנֶנּוּ, אַחַת מִנִּי-אָלֶף.

ד  חֲכַם לֵבָב, וְאַמִּיץ כֹּחַ–    מִי-הִקְשָׁה אֵלָיו, וַיִּשְׁלָם.

ה  הַמַּעְתִּיק הָרִים, וְלֹא יָדָעוּ–    אֲשֶׁר הֲפָכָם בְּאַפּוֹ.

ו  הַמַּרְגִּיז אֶרֶץ, מִמְּקוֹמָהּ;    וְעַמּוּדֶיהָ, יִתְפַּלָּצוּן.

ז  הָאֹמֵר לַחֶרֶס, וְלֹא יִזְרָח;    וּבְעַד כּוֹכָבִים יַחְתֹּם.

ח  נֹטֶה שָׁמַיִם לְבַדּוֹ;    וְדוֹרֵךְ, עַל-בָּמֳתֵי יָם.

ט  עֹשֶׂה-עָשׁ, כְּסִיל וְכִימָה;    וְחַדְרֵי תֵמָן.

י  עֹשֶׂה גְדֹלוֹת, עַד-אֵין חֵקֶר;    וְנִפְלָאוֹת, עַד-אֵין מִסְפָּר.

VN:F [1.9.21_1169]
Rating: 5.0/5 (1 vote cast)
Iyov 8:16, 5.0 out of 5 based on 1 rating