Browsing "Iyov"
Jun 13, 2014 - Iyov    No Comments

Iyov 27:18

Play

יח  בָּנָה כָעָשׁ בֵּיתוֹ;    וּכְסֻכָּה, עָשָׂה נֹצֵר.

יט  עָשִׁיר יִשְׁכַּב, וְלֹא יֵאָסֵף;    עֵינָיו פָּקַח וְאֵינֶנּוּ.

כ  תַּשִּׂיגֵהוּ כַמַּיִם, בַּלָּהוֹת;    לַיְלָה, גְּנָבַתּוּ סוּפָה.

כא  יִשָּׂאֵהוּ קָדִים וְיֵלַךְ;    וִישָׂעֲרֵהוּ, מִמְּקֹמוֹ.

כב  וְיַשְׁלֵךְ עָלָיו, וְלֹא יַחְמֹל;    מִיָּדוֹ, בָּרוֹחַ יִבְרָח.

כג  יִשְׂפֹּק עָלֵימוֹ כַפֵּימוֹ;    וְיִשְׁרֹק עָלָיו, מִמְּקֹמוֹ.

פרק כח

א  כִּי יֵשׁ לַכֶּסֶף מוֹצָא;    וּמָקוֹם, לַזָּהָב יָזֹקּוּ.

ב  בַּרְזֶל, מֵעָפָר יֻקָּח;    וְאֶבֶן, יָצוּק נְחוּשָׁה.

ג  קֵץ, שָׂם לַחֹשֶׁךְ, וּלְכָל-תַּכְלִית, הוּא חוֹקֵר:    אֶבֶן אֹפֶל וְצַלְמָוֶת.

ד  פָּרַץ נַחַל, מֵעִם-גָּר–הַנִּשְׁכָּחִים מִנִּי-רָגֶל;    דַּלּוּ מֵאֱנוֹשׁ נָעוּ.

Jun 12, 2014 - Iyov    No Comments

Iyov 27:11

Play

יא  אוֹרֶה אֶתְכֶם בְּיַד-אֵל;    אֲשֶׁר עִם-שַׁדַּי, לֹא אֲכַחֵד.

יב  הֵן-אַתֶּם כֻּלְּכֶם חֲזִיתֶם;    וְלָמָּה-זֶּה, הֶבֶל תֶּהְבָּלוּ.

יג  זֶה, חֵלֶק-אָדָם רָשָׁע עִם-אֵל;    וְנַחֲלַת עָרִיצִים, מִשַּׁדַּי יִקָּחוּ.

יד  אִם-יִרְבּוּ בָנָיו לְמוֹ-חָרֶב;    וְצֶאֱצָאָיו, לֹא יִשְׂבְּעוּ-לָחֶם.

טו  שְׂרִידָו, בַּמָּוֶת יִקָּבֵרוּ;    וְאַלְמְנֹתָיו, לֹא תִבְכֶּינָה.

טז  אִם-יִצְבֹּר כֶּעָפָר כָּסֶף;    וְכַחֹמֶר, יָכִין מַלְבּוּשׁ.

יז  יָכִין, וְצַדִּיק יִלְבָּשׁ;    וְכֶסֶף, נָקִי יַחֲלֹק.

Jun 11, 2014 - Iyov    No Comments

Iyov 26:14

Play

יד  הֶן-אֵלֶּה, קְצוֹת דְּרָכָו–    וּמַה-שֵּׁמֶץ דָּבָר, נִשְׁמַע-בּוֹ;  וְרַעַם גְּבוּרֹתָו,    מִי יִתְבּוֹנָן.

פרק כז

א   וַיֹּסֶף אִיּוֹב, שְׂאֵת מְשָׁלוֹ; וַיֹּאמַר.

ב  חַי-אֵל, הֵסִיר מִשְׁפָּטִי;    וְשַׁדַּי, הֵמַר נַפְשִׁי.

ג  כִּי-כָל-עוֹד נִשְׁמָתִי בִי;    וְרוּחַ אֱלוֹהַּ בְּאַפִּי.

ד  אִם-תְּדַבֵּרְנָה שְׂפָתַי עַוְלָה;    וּלְשׁוֹנִי, אִם-יֶהְגֶּה רְמִיָּה.

ה  חָלִילָה לִּי,    אִם-אַצְדִּיק אֶתְכֶם:  עַד-אֶגְוָע–    לֹא-אָסִיר תֻּמָּתִי מִמֶּנִּי.

ו  בְּצִדְקָתִי הֶחֱזַקְתִּי, וְלֹא אַרְפֶּהָ;    לֹא-יֶחֱרַף לְבָבִי, מִיָּמָי.

ז  יְהִי כְרָשָׁע, אֹיְבִי;    וּמִתְקוֹמְמִי כְעַוָּל.

ח  כִּי מַה-תִּקְוַת חָנֵף, כִּי יִבְצָע;    כִּי יֵשֶׁל אֱלוֹהַּ נַפְשׁוֹ.

ט  הֲצַעֲקָתוֹ, יִשְׁמַע אֵל–    כִּי-תָבוֹא עָלָיו צָרָה.

י  אִם-עַל-שַׁדַּי יִתְעַנָּג;    יִקְרָא אֱלוֹהַּ בְּכָל-עֵת.

Jun 10, 2014 - Iyov    No Comments

Iyov 26:7

Play

ז  נֹטֶה צָפוֹן עַל-תֹּהוּ;    תֹּלֶה אֶרֶץ, עַל-בְּלִי-מָה.

ח  צֹרֵר-מַיִם בְּעָבָיו;    וְלֹא-נִבְקַע עָנָן תַּחְתָּם.

ט  מְאַחֵז פְּנֵי-כִסֵּה;    פַּרְשֵׁז עָלָיו עֲנָנוֹ.

י  חֹק-חָג, עַל-פְּנֵי-מָיִם–    עַד-תַּכְלִית אוֹר עִם-חֹשֶׁךְ.

יא  עַמּוּדֵי שָׁמַיִם יְרוֹפָפוּ;    וְיִתְמְהוּ, מִגַּעֲרָתוֹ.

יב  בְּכֹחוֹ, רָגַע הַיָּם;    ובתובנתו (וּבִתְבוּנָתוֹ), מָחַץ רָהַב.

יג  בְּרוּחוֹ, שָׁמַיִם שִׁפְרָה;    חֹלְלָה יָדוֹ, נָחָשׁ בָּרִחַ.

Jun 9, 2014 - Iyov    No Comments

Iyov 25:4

Play

ד  וּמַה-יִּצְדַּק אֱנוֹשׁ עִם-אֵל;    וּמַה-יִּזְכֶּה, יְלוּד אִשָּׁה.

ה  הֵן עַד-יָרֵחַ, וְלֹא יַאֲהִיל;    וְכוֹכָבִים, לֹא-זַכּוּ בְעֵינָיו.

ו  אַף, כִּי-אֱנוֹשׁ רִמָּה;    וּבֶן-אָדָם, תּוֹלֵעָה.

פרק כו

א  וַיַּעַן אִיּוֹב, וַיֹּאמַר.

ב  מֶה-עָזַרְתָּ, לְלֹא-כֹחַ;    הוֹשַׁעְתָּ, זְרוֹעַ לֹא-עֹז.

ג  מַה-יָּעַצְתָּ, לְלֹא חָכְמָה;    וְתֻשִׁיָּה, לָרֹב הוֹדָעְתָּ.

ד  אֶת-מִי, הִגַּדְתָּ מִלִּין;    וְנִשְׁמַת-מִי, יָצְאָה מִמֶּךָּ.

ה  הָרְפָאִים יְחוֹלָלוּ–    מִתַּחַת מַיִם, וְשֹׁכְנֵיהֶם.

ו  עָרוֹם שְׁאוֹל נֶגְדּוֹ;    וְאֵין כְּסוּת, לָאֲבַדּוֹן.

Jun 6, 2014 - Iyov    No Comments

Iyov 24:25

Play

כה  וְאִם-לֹא אֵפוֹ, מִי יַכְזִיבֵנִי;    וְיָשֵׂם לְאַל, מִלָּתִי.

פרק כה

א   וַיַּעַן, בִּלְדַּד הַשֻּׁחִי; וַיֹּאמַר.

ב  הַמְשֵׁל וָפַחַד עִמּוֹ;    עֹשֶׂה שָׁלוֹם, בִּמְרוֹמָיו.

ג  הֲיֵשׁ מִסְפָּר, לִגְדוּדָיו;    וְעַל-מִי, לֹא-יָקוּם אוֹרֵהוּ.

Jun 5, 2014 - Iyov    No Comments

Iyov 24:20

Play

כ  יִשְׁכָּחֵהוּ רֶחֶם, מְתָקוֹ רִמָּה–    עוֹד לֹא-יִזָּכֵר;  וַתִּשָּׁבֵר כָּעֵץ    עַוְלָה.

כא  רֹעֶה עֲקָרָה, לֹא תֵלֵד;    וְאַלְמָנָה, לֹא יְיֵטִיב.

כב  וּמָשַׁךְ אַבִּירִים בְּכֹחוֹ;    יָקוּם, וְלֹא-יַאֲמִין בַּחַיִּין.

כג  יִתֶּן-לוֹ לָבֶטַח, וְיִשָּׁעֵן;    וְעֵינֵיהוּ, עַל-דַּרְכֵיהֶם.

כד  רוֹמּוּ מְּעַט, וְאֵינֶנּוּ,    וְהֻמְּכוּ, כַּכֹּל יִקָּפְצוּן;   וּכְרֹאשׁ שִׁבֹּלֶת    יִמָּלוּ.

Jun 2, 2014 - Iyov    No Comments

Iyov 24:16

Play

טז  חָתַר בַּחֹשֶׁךְ, בָּתִּים:    יוֹמָם חִתְּמוּ-לָמוֹ; לֹא-יָדְעוּ אוֹר.

יז  כִּי יַחְדָּו, בֹּקֶר לָמוֹ צַלְמָוֶת;    כִּי-יַכִּיר, בַּלְהוֹת צַלְמָוֶת.

יח  קַל-הוּא, עַל-פְּנֵי-מַיִם–    תְּקֻלַּל חֶלְקָתָם בָּאָרֶץ;  לֹא-יִפְנֶה,    דֶּרֶךְ כְּרָמִים.

יט  צִיָּה גַם-חֹם, יִגְזְלוּ מֵימֵי-שֶׁלֶג;    שְׁאוֹל חָטָאוּ.

May 30, 2014 - Iyov    1 Comment

Iyov 24:9

Play

ט  יִגְזְלוּ, מִשֹּׁד יָתוֹם;    וְעַל-עָנִי יַחְבֹּלוּ.

י  עָרוֹם הִלְּכוּ, בְּלִי לְבוּשׁ;    וּרְעֵבִים, נָשְׂאוּ עֹמֶר.

יא  בֵּין-שׁוּרֹתָם יַצְהִירוּ;    יְקָבִים דָּרְכוּ, וַיִּצְמָאוּ.

יב  מֵעִיר מְתִים, יִנְאָקוּ–    וְנֶפֶשׁ-חֲלָלִים תְּשַׁוֵּעַ:  וֶאֱלוֹהַּ,    לֹא-יָשִׂים תִּפְלָה.

יג  הֵמָּה, הָיוּ–בְּמֹרְדֵי-אוֹר:    לֹא-הִכִּירוּ דְרָכָיו; וְלֹא יָשְׁבוּ, בִּנְתִיבֹתָיו.

יד  לָאוֹר, יָקוּם רוֹצֵחַ–יִקְטָל-עָנִי וְאֶבְיוֹן;    וּבַלַּיְלָה, יְהִי כַגַּנָּב.

טו  וְעֵין נֹאֵף, שָׁמְרָה נֶשֶׁף לֵאמֹר–    לֹא-תְשׁוּרֵנִי עָיִן;  וְסֵתֶר פָּנִים    יָשִׂים.

טז  חָתַר בַּחֹשֶׁךְ, בָּתִּים:    יוֹמָם חִתְּמוּ-לָמוֹ; לֹא-יָדְעוּ אוֹר.

May 29, 2014 - Iyov    No Comments

Iyov 24:1

Play

א  מַדּוּעַ–מִשַּׁדַּי, לֹא-נִצְפְּנוּ עִתִּים;    וְיֹדְעָו, לֹא-חָזוּ יָמָיו.

ב  גְּבֻלוֹת יַשִּׂיגוּ;    עֵדֶר גָּזְלוּ, וַיִּרְעוּ.

ג  חֲמוֹר יְתוֹמִים יִנְהָגוּ;    יַחְבְּלוּ, שׁוֹר אַלְמָנָה.

ד  יַטּוּ אֶבְיֹנִים מִדָּרֶךְ;    יַחַד חֻבְּאוּ, עֲנִיֵּי-אָרֶץ.

ה  הֵן פְּרָאִים, בַּמִּדְבָּר–    יָצְאוּ בְּפָעֳלָם, מְשַׁחֲרֵי לַטָּרֶף;  עֲרָבָה לוֹ לֶחֶם,    לַנְּעָרִים.

ו  בַּשָּׂדֶה, בְּלִילוֹ יקצירו (יִקְצוֹרוּ);    וְכֶרֶם רָשָׁע יְלַקֵּשׁוּ.

ז  עָרוֹם יָלִינוּ, מִבְּלִי לְבוּשׁ;    וְאֵין כְּסוּת, בַּקָּרָה.

ח  מִזֶּרֶם הָרִים יִרְטָבוּ;    וּמִבְּלִי מַחְסֶה, חִבְּקוּ-צוּר.