The Morning Kollel

Podcast: Play in new window | Download (Duration: 44:15 — 15.2MB)

Subscribe: Email | RSS

יט וַיְחַזֵּק עַל-יָדוֹ עֵזֶר בֶּן-יֵשׁוּעַ, שַׂר הַמִּצְפָּה–מִדָּה שֵׁנִית:  מִנֶּגֶד, עֲלֹת הַנֶּשֶׁק הַמִּקְצֹעַ.  {ס}

כ אַחֲרָיו הֶחֱרָה הֶחֱזִיק בָּרוּךְ בֶּן-זבי (זַכַּי), מִדָּה שֵׁנִית:  מִן-הַמִּקְצוֹעַ–עַד-פֶּתַח בֵּית אֶלְיָשִׁיב, הַכֹּהֵן הַגָּדוֹל.  {ס}

כא אַחֲרָיו הֶחֱזִיק, מְרֵמוֹת בֶּן-אוּרִיָּה בֶּן-הַקּוֹץ–מִדָּה שֵׁנִית:  מִפֶּתַח בֵּית אֶלְיָשִׁיב, וְעַד-תַּכְלִית בֵּית אֶלְיָשִׁיב.  {ס}

כב וְאַחֲרָיו הֶחֱזִיקוּ הַכֹּהֲנִים, אַנְשֵׁי הַכִּכָּר.

כג אַחֲרָיו הֶחֱזִיק בִּנְיָמִן וְחַשּׁוּב, נֶגֶד בֵּיתָם;  {ס}  אַחֲרָיו הֶחֱזִיק, עֲזַרְיָה בֶן-מַעֲשֵׂיָה בֶּן-עֲנָנְיָה–אֵצֶל בֵּיתוֹ.  {ס}

כד אַחֲרָיו הֶחֱזִיק, בִּנּוּי בֶּן-חֵנָדָד–מִדָּה שֵׁנִית:  מִבֵּית עֲזַרְיָה, עַד-הַמִּקְצוֹעַ וְעַד-הַפִּנָּה.

כה פָּלָל בֶּן-אוּזַי, מִנֶּגֶד הַמִּקְצוֹעַ, וְהַמִּגְדָּל הַיּוֹצֵא מִבֵּית הַמֶּלֶךְ הָעֶלְיוֹן, אֲשֶׁר לַחֲצַר הַמַּטָּרָה; אַחֲרָיו, פְּדָיָה בֶן-פַּרְעֹשׁ.  {ס}

כו וְהַנְּתִינִים–הָיוּ יֹשְׁבִים, בָּעֹפֶל:  עַד נֶגֶד שַׁעַר הַמַּיִם, לַמִּזְרָח, וְהַמִּגְדָּל, הַיּוֹצֵא.  {ס}

כז אַחֲרָיו הֶחֱזִיקוּ הַתְּקֹעִים, מִדָּה שֵׁנִית:  מִנֶּגֶד הַמִּגְדָּל הַגָּדוֹל, הַיּוֹצֵא, וְעַד, חוֹמַת הָעֹפֶל.

כח מֵעַל שַׁעַר הַסּוּסִים, הֶחֱזִיקוּ הַכֹּהֲנִים–אִישׁ, לְנֶגֶד בֵּיתוֹ.  {ס}

כט אַחֲרָיו הֶחֱזִיק צָדוֹק בֶּן-אִמֵּר, נֶגֶד בֵּיתוֹ;  {ס}  וְאַחֲרָיו הֶחֱזִיק שְׁמַעְיָה בֶן-שְׁכַנְיָה, שֹׁמֵר שַׁעַר הַמִּזְרָח.  {ס}

ל אחרי (אַחֲרָיו) הֶחֱזִיק חֲנַנְיָה בֶן-שֶׁלֶמְיָה, וְחָנוּן בֶּן-צָלָף הַשִּׁשִּׁי–מִדָּה שֵׁנִי;  {ס}  אַחֲרָיו הֶחֱזִיק, מְשֻׁלָּם בֶּן-בֶּרֶכְיָה–נֶגֶד, נִשְׁכָּתוֹ.  {ס}

לא אחרי (אַחֲרָיו) הֶחֱזִיק, מַלְכִּיָּה בֶּן-הַצֹּרְפִי–עַד-בֵּית הַנְּתִינִים, וְהָרֹכְלִים:  נֶגֶד שַׁעַר הַמִּפְקָד, וְעַד עֲלִיַּת הַפִּנָּה.

לב וּבֵין עֲלִיַּת הַפִּנָּה לְשַׁעַר הַצֹּאן, הֶחֱזִיקוּ הַצֹּרְפִים וְהָרֹכְלִים.  {פ}