Browsing "Divrei Hayamim"
Oct 2, 2013 - Divrei Hayamim    No Comments

Divrei Hayamim I 21:2

Play

Podcast: Play in new window | Download (Duration: 54:23 — 18.7MB)

Subscribe: Email | RSS

ב וַיֹּאמֶר דָּוִיד אֶל-יוֹאָב, וְאֶל-שָׂרֵי הָעָם, לְכוּ סִפְרוּ אֶת-יִשְׂרָאֵל, מִבְּאֵר שֶׁבַע וְעַד-דָּן; וְהָבִיאוּ אֵלַי, וְאֵדְעָה אֶת-מִסְפָּרָם.

ג וַיֹּאמֶר יוֹאָב, יוֹסֵף יְהוָה עַל-עַמּוֹ כָּהֵם מֵאָה פְעָמִים–הֲלֹא אֲדֹנִי הַמֶּלֶךְ, כֻּלָּם לַאדֹנִי לַעֲבָדִים; לָמָּה יְבַקֵּשׁ זֹאת אֲדֹנִי, לָמָּה יִהְיֶה לְאַשְׁמָה לְיִשְׂרָאֵל.

ד וּדְבַר-הַמֶּלֶךְ, חָזַק עַל-יוֹאָב; וַיֵּצֵא יוֹאָב, וַיִּתְהַלֵּךְ בְּכָל-יִשְׂרָאֵל, וַיָּבֹא, יְרוּשָׁלִָם.

ה וַיִּתֵּן יוֹאָב אֶת-מִסְפַּר מִפְקַד-הָעָם, אֶל-דָּוִיד; וַיְהִי כָל-יִשְׂרָאֵל אֶלֶף אֲלָפִים וּמֵאָה אֶלֶף אִישׁ, שֹׁלֵף חֶרֶב, וִיהוּדָה, אַרְבַּע מֵאוֹת וְשִׁבְעִים אֶלֶף אִישׁ שֹׁלֵף חָרֶב.

ו וְלֵוִי, וּבִנְיָמִן, לֹא פָקַד, בְּתוֹכָם:  כִּי-נִתְעַב דְּבַר-הַמֶּלֶךְ, אֶת-יוֹאָב.

ז וַיֵּרַע בְּעֵינֵי הָאֱלֹהִים, עַל-הַדָּבָר הַזֶּה; וַיַּךְ, אֶת-יִשְׂרָאֵל.  {ס}

ח וַיֹּאמֶר דָּוִיד, אֶל-הָאֱלֹהִים, חָטָאתִי מְאֹד, אֲשֶׁר עָשִׂיתִי אֶת-הַדָּבָר הַזֶּה; וְעַתָּה, הַעֲבֶר-נָא אֶת-עֲווֹן עַבְדְּךָ, כִּי נִסְכַּלְתִּי, מְאֹד.  {פ}

ט וַיְדַבֵּר יְהוָה אֶל-גָּד, חֹזֵה דָוִיד לֵאמֹר.

י לֵךְ וְדִבַּרְתָּ אֶל-דָּוִיד לֵאמֹר, כֹּה אָמַר יְהוָה, שָׁלוֹשׁ, אֲנִי נֹטֶה עָלֶיךָ:  בְּחַר-לְךָ אַחַת מֵהֵנָּה, וְאֶעֱשֶׂה-לָּךְ.

יא וַיָּבֹא גָד, אֶל-דָּוִיד; וַיֹּאמֶר לוֹ כֹּה-אָמַר יְהוָה, קַבֶּל-לָךְ.

יב אִם-שָׁלוֹשׁ שָׁנִים רָעָב, וְאִם-שְׁלֹשָׁה חֳדָשִׁים נִסְפֶּה מִפְּנֵי-צָרֶיךָ וְחֶרֶב אוֹיְבֶיךָ לְמַשֶּׂגֶת, וְאִם-שְׁלֹשֶׁת יָמִים חֶרֶב יְהוָה וְדֶבֶר בָּאָרֶץ, וּמַלְאַךְ יְהוָה מַשְׁחִית בְּכָל-גְּבוּל יִשְׂרָאֵל:  וְעַתָּה רְאֵה, מָה-אָשִׁיב אֶת-שֹׁלְחִי דָּבָר.  {ס} 

Sep 30, 2013 - Divrei Hayamim    No Comments

Divrei Hayamim I 19:14

Play

Podcast: Play in new window | Download (Duration: 57:48 — 19.8MB)

Subscribe: Email | RSS

יד וַיִּגַּשׁ יוֹאָב וְהָעָם אֲשֶׁר-עִמּוֹ, לִפְנֵי אֲרָם–לַמִּלְחָמָה; וַיָּנוּסוּ, מִפָּנָיו.

טו וּבְנֵי עַמּוֹן רָאוּ, כִּי-נָס אֲרָם, וַיָּנוּסוּ גַם-הֵם מִפְּנֵי אַבְשַׁי אָחִיו, וַיָּבֹאוּ הָעִירָה; וַיָּבֹא יוֹאָב, יְרוּשָׁלִָם.  {ס}

טז וַיַּרְא אֲרָם, כִּי נִגְּפוּ לִפְנֵי יִשְׂרָאֵל, וַיִּשְׁלְחוּ מַלְאָכִים, וַיּוֹצִיאוּ אֶת-אֲרָם אֲשֶׁר מֵעֵבֶר הַנָּהָר; וְשׁוֹפַךְ שַׂר-צְבָא הֲדַדְעֶזֶר, לִפְנֵיהֶם.

יז וַיֻּגַּד לְדָוִיד, וַיֶּאֱסֹף אֶת-כָּל-יִשְׂרָאֵל וַיַּעֲבֹר הַיַּרְדֵּן, וַיָּבֹא אֲלֵהֶם, וַיַּעֲרֹךְ אֲלֵהֶם; וַיַּעֲרֹךְ דָּוִיד לִקְרַאת אֲרָם, מִלְחָמָה, וַיִּלָּחֲמוּ, עִמּוֹ.

יח וַיָּנָס אֲרָם, מִלִּפְנֵי יִשְׂרָאֵל, וַיַּהֲרֹג דָּוִיד מֵאֲרָם שִׁבְעַת אֲלָפִים רֶכֶב, וְאַרְבָּעִים אֶלֶף אִישׁ רַגְלִי; וְאֵת שׁוֹפַךְ שַׂר-הַצָּבָא, הֵמִית.

יט וַיִּרְאוּ עַבְדֵי הֲדַדְעֶזֶר, כִּי נִגְּפוּ לִפְנֵי יִשְׂרָאֵל, וַיַּשְׁלִימוּ עִם-דָּוִיד, וַיַּעַבְדֻהוּ; וְלֹא-אָבָה אֲרָם, לְהוֹשִׁיעַ אֶת-בְּנֵי-עַמּוֹן עוֹד.  {ס}

פרק כ

א וַיְהִי לְעֵת תְּשׁוּבַת הַשָּׁנָה לְעֵת צֵאת הַמְּלָכִים, וַיִּנְהַג יוֹאָב אֶת-חֵיל הַצָּבָא וַיַּשְׁחֵת אֶת-אֶרֶץ בְּנֵי-עַמּוֹן וַיָּבֹא וַיָּצַר אֶת-רַבָּה, וְדָוִיד, יֹשֵׁב בִּירוּשָׁלִָם; וַיַּךְ יוֹאָב אֶת-רַבָּה, וַיֶּהֶרְסֶהָ.

ב וַיִּקַּח דָּוִיד אֶת-עֲטֶרֶת-מַלְכָּם מֵעַל רֹאשׁוֹ וַיִּמְצָאָהּ מִשְׁקַל כִּכַּר-זָהָב, וּבָהּ אֶבֶן יְקָרָה, וַתְּהִי, עַל-רֹאשׁ דָּוִיד; וּשְׁלַל הָעִיר הוֹצִיא, הַרְבֵּה מְאֹד.

ג וְאֶת-הָעָם אֲשֶׁר-בָּהּ הוֹצִיא, וַיָּשַׂר בַּמְּגֵרָה וּבַחֲרִיצֵי הַבַּרְזֶל וּבַמְּגֵרוֹת, וְכֵן יַעֲשֶׂה דָוִיד, לְכֹל עָרֵי בְנֵי-עַמּוֹן; וַיָּשָׁב דָּוִיד וְכָל-הָעָם, יְרוּשָׁלִָם.  {ס}

ד וַיְהִי, אַחֲרֵי כֵן, וַתַּעֲמֹד מִלְחָמָה בְּגֶזֶר, עִם-פְּלִשְׁתִּים; אָז הִכָּה סִבְּכַי הַחֻשָׁתִי, אֶת-סִפַּי מִילִידֵי הָרְפָאִים–וַיִּכָּנֵעוּ.

ה וַתְּהִי-עוֹד מִלְחָמָה, אֶת-פְּלִשְׁתִּים; וַיַּךְ אֶלְחָנָן בֶּן-יעור (יָעִיר), אֶת-לַחְמִי אֲחִי גָּלְיָת הַגִּתִּי–וְעֵץ חֲנִיתוֹ, כִּמְנוֹר אֹרְגִים.  {ס}

ו וַתְּהִי-עוֹד מִלְחָמָה, בְּגַת; וַיְהִי אִישׁ מִדָּה, וְאֶצְבְּעֹתָיו שֵׁשׁ-וָשֵׁשׁ עֶשְׂרִים וְאַרְבַּע, וְגַם-הוּא, נוֹלַד לְהָרָפָא.

ז וַיְחָרֵף, אֶת-יִשְׂרָאֵל; וַיַּכֵּהוּ, יְהוֹנָתָן, בֶּן-שִׁמְעָא, אֲחִי דָוִיד.

ח אֵל נוּלְּדוּ לְהָרָפָא, בְּגַת; וַיִּפְּלוּ בְיַד-דָּוִיד, וּבְיַד-עֲבָדָיו.  {פ}

Sep 21, 2013 - Divrei Hayamim    No Comments

Divrei Hayamim I 19:1

Play

Podcast: Play in new window | Download (Duration: 55:43 — 19.1MB)

Subscribe: Email | RSS

א וַיְהִי, אַחֲרֵי-כֵן, וַיָּמָת, נָחָשׁ מֶלֶךְ בְּנֵי-עַמּוֹן; וַיִּמְלֹךְ בְּנוֹ, תַּחְתָּיו.

ב וַיֹּאמֶר דָּוִיד אֶעֱשֶׂה-חֶסֶד עִם-חָנוּן בֶּן-נָחָשׁ, כִּי-עָשָׂה אָבִיו עִמִּי חֶסֶד, וַיִּשְׁלַח דָּוִיד מַלְאָכִים, לְנַחֲמוֹ עַל-אָבִיו; וַיָּבֹאוּ עַבְדֵי דָוִיד אֶל-אֶרֶץ בְּנֵי-עַמּוֹן, אֶל-חָנוּן–לְנַחֲמוֹ.

ג וַיֹּאמְרוּ שָׂרֵי בְנֵי-עַמּוֹן לְחָנוּן, הַמְכַבֵּד דָּוִיד אֶת-אָבִיךָ בְּעֵינֶיךָ, כִּי-שָׁלַח לְךָ, מְנַחֲמִים; הֲלֹא בַּעֲבוּר לַחְקֹר וְלַהֲפֹךְ וּלְרַגֵּל, הָאָרֶץ, בָּאוּ עֲבָדָיו, אֵלֶיךָ.

ד וַיִּקַּח חָנוּן אֶת-עַבְדֵי דָוִיד, וַיְגַלְּחֵם, וַיִּכְרֹת אֶת-מַדְוֵיהֶם בַּחֵצִי, עַד-הַמִּפְשָׂעָה; וַיְשַׁלְּחֵם.

ה וַיֵּלְכוּ וַיַּגִּידוּ לְדָוִיד עַל-הָאֲנָשִׁים וַיִּשְׁלַח לִקְרָאתָם, כִּי-הָיוּ הָאֲנָשִׁים נִכְלָמִים מְאֹד; וַיֹּאמֶר הַמֶּלֶךְ שְׁבוּ בִירֵחוֹ, עַד אֲשֶׁר-יְצַמַּח זְקַנְכֶם וְשַׁבְתֶּם.  {ס}

ו וַיִּרְאוּ בְּנֵי עַמּוֹן, כִּי הִתְבָּאֲשׁוּ עִם-דָּוִיד; וַיִּשְׁלַח חָנוּן וּבְנֵי עַמּוֹן אֶלֶף כִּכַּר-כֶּסֶף, לִשְׂכֹּר לָהֶם מִן-אֲרַם נַהֲרַיִם וּמִן-אֲרַם מַעֲכָה וּמִצּוֹבָה, רֶכֶב, וּפָרָשִׁים.

ז וַיִּשְׂכְּרוּ לָהֶם שְׁנַיִם וּשְׁלֹשִׁים אֶלֶף רֶכֶב, וְאֶת-מֶלֶךְ מַעֲכָה וְאֶת-עַמּוֹ, וַיָּבֹאוּ, וַיַּחֲנוּ לִפְנֵי מֵידְבָא;  {ס}  וּבְנֵי עַמּוֹן, נֶאֶסְפוּ מֵעָרֵיהֶם, וַיָּבֹאוּ, לַמִּלְחָמָה.  {ס}

ח וַיִּשְׁמַע, דָּוִיד; וַיִּשְׁלַח, אֶת-יוֹאָב, וְאֵת כָּל-צָבָא, הַגִּבּוֹרִים.

ט וַיֵּצְאוּ בְּנֵי עַמּוֹן, וַיַּעַרְכוּ מִלְחָמָה פֶּתַח הָעִיר; וְהַמְּלָכִים אֲשֶׁר-בָּאוּ, לְבַדָּם בַּשָּׂדֶה.

י וַיַּרְא יוֹאָב, כִּי-הָיְתָה פְנֵי-הַמִּלְחָמָה אֵלָיו–פָּנִים וְאָחוֹר; וַיִּבְחַר, מִכָּל-בָּחוּר בְּיִשְׂרָאֵל, וַיַּעֲרֹךְ, לִקְרַאת אֲרָם.

יא וְאֵת, יֶתֶר הָעָם, נָתַן, בְּיַד אַבְשַׁי אָחִיו; וַיַּעַרְכוּ, לִקְרַאת בְּנֵי עַמּוֹן.

יב וַיֹּאמֶר, אִם-תֶּחֱזַק מִמֶּנִּי אֲרָם–וְהָיִיתָ לִּי, לִתְשׁוּעָה;  {ס}  וְאִם-בְּנֵי עַמּוֹן יֶחֶזְקוּ מִמְּךָ, וְהוֹשַׁעְתִּיךָ.

יג חֲזַק וְנִתְחַזְּקָה בְּעַד-עַמֵּנוּ, וּבְעַד עָרֵי אֱלֹהֵינוּ; וַיהוָה, הַטּוֹב בְּעֵינָיו יַעֲשֶׂה.

Sep 18, 2013 - Divrei Hayamim    No Comments

Divrei Hayamim I 18:2

Play

Podcast: Play in new window | Download (Duration: 54:34 — 18.7MB)

Subscribe: Email | RSS

ב וַיַּךְ, אֶת-מוֹאָב; וַיִּהְיוּ מוֹאָב עֲבָדִים לְדָוִיד, נֹשְׂאֵי מִנְחָה.

ג וַיַּךְ דָּוִיד אֶת-הֲדַדְעֶזֶר מֶלֶךְ-צוֹבָה, חֲמָתָה, בְּלֶכְתּוֹ, לְהַצִּיב יָדוֹ בִּנְהַר-פְּרָת.

ד וַיִּלְכֹּד דָּוִיד מִמֶּנּוּ אֶלֶף רֶכֶב, וְשִׁבְעַת אֲלָפִים פָּרָשִׁים, וְעֶשְׂרִים אֶלֶף, אִישׁ רַגְלִי; וַיְעַקֵּר דָּוִיד אֶת-כָּל-הָרֶכֶב, וַיּוֹתֵר מִמֶּנּוּ מֵאָה רָכֶב.

ה וַיָּבֹא, אֲרַם דַּרְמֶשֶׂק, לַעְזוֹר, לַהֲדַדְעֶזֶר מֶלֶךְ צוֹבָה; וַיַּךְ דָּוִיד בַּאֲרָם, עֶשְׂרִים-וּשְׁנַיִם אֶלֶף אִישׁ.

ו וַיָּשֶׂם דָּוִיד, בַּאֲרַם דַּרְמֶשֶׂק, וַיְהִי אֲרָם לְדָוִיד, עֲבָדִים נֹשְׂאֵי מִנְחָה; וַיּוֹשַׁע יְהוָה לְדָוִיד, בְּכֹל אֲשֶׁר הָלָךְ.

ז וַיִּקַּח דָּוִיד, אֵת שִׁלְטֵי הַזָּהָב, אֲשֶׁר הָיוּ, עַל עַבְדֵי הֲדַדְעָזֶר; וַיְבִיאֵם, יְרוּשָׁלִָם.

ח וּמִטִּבְחַת וּמִכּוּן עָרֵי הֲדַדְעֶזֶר, לָקַח דָּוִיד נְחֹשֶׁת רַבָּה מְאֹד; בָּהּ עָשָׂה שְׁלֹמֹה, אֶת-יָם הַנְּחֹשֶׁת וְאֶת-הָעַמּוּדִים, וְאֵת, כְּלֵי הַנְּחֹשֶׁת.  {פ}

ט וַיִּשְׁמַע, תֹּעוּ מֶלֶךְ חֲמָת:  כִּי הִכָּה דָוִיד, אֶת-כָּל-חֵיל הֲדַדְעֶזֶר מֶלֶךְ-צוֹבָה.

י וַיִּשְׁלַח אֶת-הֲדוֹרָם-בְּנוֹ אֶל-הַמֶּלֶךְ-דָּוִיד לשאול- (לִשְׁאָל-) לוֹ לְשָׁלוֹם וּלְבָרְכוֹ, עַל אֲשֶׁר נִלְחַם בַּהֲדַדְעֶזֶר וַיַּכֵּהוּ–כִּי-אִישׁ מִלְחֲמוֹת תֹּעוּ, הָיָה הֲדַדְעָזֶר; וְכֹל, כְּלֵי זָהָב וָכֶסֶף–וּנְחֹשֶׁת.

יא גַּם-אֹתָם, הִקְדִּישׁ הַמֶּלֶךְ דָּוִיד לַיהוָה, עִם-הַכֶּסֶף וְהַזָּהָב, אֲשֶׁר נָשָׂא מִכָּל-הַגּוֹיִם–מֵאֱדוֹם וּמִמּוֹאָב וּמִבְּנֵי עַמּוֹן, וּמִפְּלִשְׁתִּים וּמֵעֲמָלֵק.

יב וְאַבְשַׁי בֶּן-צְרוּיָה, הִכָּה אֶת-אֱדוֹם בְּגֵיא הַמֶּלַח, שְׁמוֹנָה עָשָׂר, אָלֶף.

יג וַיָּשֶׂם בֶּאֱדוֹם נְצִיבִים, וַיִּהְיוּ כָל-אֱדוֹם עֲבָדִים לְדָוִיד; וַיּוֹשַׁע יְהוָה אֶת-דָּוִיד, בְּכֹל אֲשֶׁר הָלָךְ.

יד וַיִּמְלֹךְ דָּוִיד, עַל-כָּל-יִשְׂרָאֵל; וַיְהִי, עֹשֶׂה מִשְׁפָּט וּצְדָקָה–לְכָל-עַמּוֹ.

טו וְיוֹאָב בֶּן-צְרוּיָה, עַל-הַצָּבָא; וִיהוֹשָׁפָט בֶּן-אֲחִילוּד, מַזְכִּיר.

טז וְצָדוֹק בֶּן-אֲחִיטוּב וַאֲבִימֶלֶךְ בֶּן-אֶבְיָתָר, כֹּהֲנִים; וְשַׁוְשָׁא, סוֹפֵר.

יז וּבְנָיָהוּ, בֶּן-יְהוֹיָדָע, עַל-הַכְּרֵתִי, וְהַפְּלֵתִי; וּבְנֵי-דָוִיד הָרִאשֹׁנִים, לְיַד הַמֶּלֶךְ.  {פ}

Sep 17, 2013 - Divrei Hayamim    No Comments

Divrei Hayamim I 17:19

Play

Podcast: Play in new window | Download (Duration: 58:15 — 20.0MB)

Subscribe: Email | RSS

יט יְהוָה–בַּעֲבוּר עַבְדְּךָ וּכְלִבְּךָ, עָשִׂיתָ אֵת כָּל-הַגְּדוּלָּה הַזֹּאת:  לְהֹדִיעַ, אֶת-כָּל-הַגְּדֻלּוֹת.

כ יְהוָה אֵין כָּמוֹךָ, וְאֵין אֱלֹהִים זוּלָתֶךָ, בְּכֹל אֲשֶׁר-שָׁמַעְנוּ, בְּאָזְנֵינוּ.

כא וּמִי כְּעַמְּךָ יִשְׂרָאֵל, גּוֹי אֶחָד בָּאָרֶץ:  אֲשֶׁר הָלַךְ הָאֱלֹהִים לִפְדּוֹת לוֹ עָם, לָשׂוּם לְךָ שֵׁם גְּדֻלּוֹת וְנֹרָאוֹת–לְגָרֵשׁ מִפְּנֵי עַמְּךָ אֲשֶׁר-פָּדִיתָ מִמִּצְרַיִם, גּוֹיִם.

כב וַתִּתֵּן אֶת-עַמְּךָ יִשְׂרָאֵל לְךָ, לְעָם–עַד-עוֹלָם; וְאַתָּה יְהוָה, הָיִיתָ לָהֶם לֵאלֹהִים.

כג וְעַתָּה יְהוָה–הַדָּבָר אֲשֶׁר דִּבַּרְתָּ עַל-עַבְדְּךָ וְעַל-בֵּיתוֹ, יֵאָמֵן עַד-עוֹלָם; וַעֲשֵׂה, כַּאֲשֶׁר דִּבַּרְתָּ.

כד וְיֵאָמֵן וְיִגְדַּל שִׁמְךָ עַד-עוֹלָם, לֵאמֹר–יְהוָה צְבָאוֹת אֱלֹהֵי יִשְׂרָאֵל, אֱלֹהִים לְיִשְׂרָאֵל; וּבֵית-דָּוִיד עַבְדְּךָ, נָכוֹן לְפָנֶיךָ.

כה כִּי אַתָּה אֱלֹהַי, גָּלִיתָ אֶת-אֹזֶן עַבְדְּךָ, לִבְנוֹת לוֹ, בָּיִת; עַל-כֵּן מָצָא עַבְדְּךָ, לְהִתְפַּלֵּל לְפָנֶיךָ.

כו וְעַתָּה יְהוָה, אַתָּה-הוּא הָאֱלֹהִים; וַתְּדַבֵּר, עַל-עַבְדְּךָ, הַטּוֹבָה, הַזֹּאת.

כז וְעַתָּה, הוֹאַלְתָּ לְבָרֵךְ אֶת-בֵּית עַבְדְּךָ, לִהְיוֹת לְעוֹלָם, לְפָנֶיךָ:  כִּי-אַתָּה יְהוָה בֵּרַכְתָּ, וּמְבֹרָךְ לְעוֹלָם.  {פ}

Sep 16, 2013 - Divrei Hayamim    No Comments

Divrei Hayamim I 17:16

Play

Podcast: Play in new window | Download (Duration: 50:34 — 17.4MB)

Subscribe: Email | RSS

טז וַיָּבֹא הַמֶּלֶךְ דָּוִיד, וַיֵּשֶׁב לִפְנֵי יְהוָה; וַיֹּאמֶר, מִי-אֲנִי יְהוָה אֱלֹהִים וּמִי בֵיתִי, כִּי הֲבִיאֹתַנִי, עַד-הֲלֹם.

יז וַתִּקְטַן זֹאת בְּעֵינֶיךָ אֱלֹהִים, וַתְּדַבֵּר עַל-בֵּית-עַבְדְּךָ לְמֵרָחוֹק; וּרְאִיתַנִי, כְּתוֹר הָאָדָם הַמַּעֲלָה–יְהוָה אֱלֹהִים.

יח מַה-יּוֹסִיף עוֹד דָּוִיד אֵלֶיךָ, לְכָבוֹד אֶת-עַבְדֶּךָ; וְאַתָּה, אֶת-עַבְדְּךָ יָדָעְתָּ.

Sep 12, 2013 - Divrei Hayamim    No Comments

Divrei Hayamim I 17:7

Play

Podcast: Play in new window | Download (Duration: 57:58 — 19.9MB)

Subscribe: Email | RSS

ז וְעַתָּה כֹּה-תֹאמַר לְעַבְדִּי לְדָוִיד,  {ס}  כֹּה אָמַר יְהוָה צְבָאוֹת, אֲנִי לְקַחְתִּיךָ מִן-הַנָּוֶה, מִן-אַחֲרֵי הַצֹּאן–לִהְיוֹת נָגִיד, עַל עַמִּי יִשְׂרָאֵל.

ח וָאֶהְיֶה עִמְּךָ, בְּכֹל אֲשֶׁר הָלַכְתָּ, וָאַכְרִית אֶת-כָּל-אוֹיְבֶיךָ, מִפָּנֶיךָ; וְעָשִׂיתִי לְךָ שֵׁם, כְּשֵׁם הַגְּדוֹלִים אֲשֶׁר בָּאָרֶץ.

ט וְשַׂמְתִּי מָקוֹם לְעַמִּי יִשְׂרָאֵל וּנְטַעְתִּיהוּ, וְשָׁכַן תַּחְתָּיו, וְלֹא יִרְגַּז, עוֹד; וְלֹא-יוֹסִיפוּ בְנֵי-עַוְלָה לְבַלֹּתוֹ, כַּאֲשֶׁר בָּרִאשׁוֹנָה.

י וּלְמִיָּמִים, אֲשֶׁר צִוִּיתִי שֹׁפְטִים עַל-עַמִּי יִשְׂרָאֵל, וְהִכְנַעְתִּי, אֶת-כָּל-אוֹיְבֶיךָ; וָאַגִּד לָךְ, וּבַיִת יִבְנֶה-לְּךָ יְהוָה.

יא וְהָיָה, כִּי-מָלְאוּ יָמֶיךָ לָלֶכֶת עִם-אֲבֹתֶיךָ, וַהֲקִימוֹתִי אֶת-זַרְעֲךָ אַחֲרֶיךָ, אֲשֶׁר יִהְיֶה מִבָּנֶיךָ; וַהֲכִינוֹתִי, אֶת-מַלְכוּתוֹ.

יב הוּא יִבְנֶה-לִּי, בָּיִת; וְכֹנַנְתִּי אֶת-כִּסְאוֹ, עַד-עוֹלָם.

יג אֲנִי אֶהְיֶה-לּוֹ לְאָב, וְהוּא יִהְיֶה-לִּי לְבֵן; וְחַסְדִּי, לֹא-אָסִיר מֵעִמּוֹ, כַּאֲשֶׁר הֲסִירוֹתִי, מֵאֲשֶׁר הָיָה לְפָנֶיךָ.

יד וְהַעֲמַדְתִּיהוּ בְּבֵיתִי וּבְמַלְכוּתִי, עַד-הָעוֹלָם; וְכִסְאוֹ, יִהְיֶה נָכוֹן עַד-עוֹלָם.

טו כְּכֹל הַדְּבָרִים הָאֵלֶּה, וּכְכֹל הֶחָזוֹן הַזֶּה–כֵּן דִּבֶּר נָתָן, אֶל-דָּוִיד.  {פ}

טז וַיָּבֹא הַמֶּלֶךְ דָּוִיד, וַיֵּשֶׁב לִפְנֵי יְהוָה; וַיֹּאמֶר, מִי-אֲנִי יְהוָה אֱלֹהִים וּמִי בֵיתִי, כִּי הֲבִיאֹתַנִי, עַד-הֲלֹם.

Sep 11, 2013 - Divrei Hayamim    No Comments

Divrei Hayamim I 17:1

Play

Podcast: Play in new window | Download (Duration: 57:20 — 19.7MB)

Subscribe: Email | RSS

א וַיְהִי, כַּאֲשֶׁר יָשַׁב דָּוִיד בְּבֵיתוֹ; וַיֹּאמֶר דָּוִיד אֶל-נָתָן הַנָּבִיא, הִנֵּה אָנֹכִי יוֹשֵׁב בְּבֵית הָאֲרָזִים, וַאֲרוֹן בְּרִית-יְהוָה, תַּחַת יְרִיעוֹת.

ב וַיֹּאמֶר נָתָן אֶל-דָּוִיד, כֹּל אֲשֶׁר בִּלְבָבְךָ עֲשֵׂה:  כִּי הָאֱלֹהִים, עִמָּךְ.  {ס}

ג וַיְהִי, בַּלַּיְלָה הַהוּא; וַיְהִי, דְּבַר-אֱלֹהִים, אֶל-נָתָן, לֵאמֹר.

ד לֵךְ וְאָמַרְתָּ אֶל-דָּוִיד עַבְדִּי, כֹּה אָמַר יְהוָה:  לֹא אַתָּה תִּבְנֶה-לִּי הַבַּיִת, לָשָׁבֶת.

ה כִּי לֹא יָשַׁבְתִּי, בְּבַיִת, מִן-הַיּוֹם אֲשֶׁר הֶעֱלֵיתִי אֶת-יִשְׂרָאֵל, עַד הַיּוֹם הַזֶּה; וָאֶהְיֶה מֵאֹהֶל אֶל-אֹהֶל, וּמִמִּשְׁכָּן.

ו בְּכֹל אֲשֶׁר-הִתְהַלַּכְתִּי, בְּכָל-יִשְׂרָאֵל, הֲדָבָר דִּבַּרְתִּי אֶת-אַחַד שֹׁפְטֵי יִשְׂרָאֵל, אֲשֶׁר צִוִּיתִי לִרְעוֹת אֶת-עַמִּי לֵאמֹר:  לָמָּה לֹא-בְנִיתֶם לִי, בֵּית אֲרָזִים.

Sep 10, 2013 - Divrei Hayamim    No Comments

Divrei Hayamim I 16:16

Play

Podcast: Play in new window | Download (Duration: 52:09 — 17.9MB)

Subscribe: Email | RSS

טז אֲשֶׁר כָּרַת, אֶת-אַבְרָהָם–  {ס}  וּשְׁבוּעָתוֹ, לְיִצְחָק.  {ר}

יז וַיַּעֲמִידֶהָ לְיַעֲקֹב, לְחֹק–  {ס}  לְיִשְׂרָאֵל, בְּרִית עוֹלָם.  {ר}

יח לֵאמֹר, לְךָ אֶתֵּן אֶרֶץ-כְּנָעַן–  {ס}  חֶבֶל, נַחֲלַתְכֶם.  {ר}

יט בִּהְיוֹתְכֶם, מְתֵי מִסְפָּר–  {ס}  כִּמְעַט, וְגָרִים בָּהּ.  {ר}

כ וַיִּתְהַלְּכוּ, מִגּוֹי אֶל-גּוֹי–  {ס}  וּמִמַּמְלָכָה, אֶל-עַם אַחֵר.  {ר}

כא לֹא-הִנִּיחַ לְאִישׁ, לְעָשְׁקָם–  {ס}  וַיּוֹכַח עֲלֵיהֶם, מְלָכִים.  {ר}

כב אַל-תִּגְּעוּ, בִּמְשִׁיחָי–  {ס}  וּבִנְבִיאַי, אַל-תָּרֵעוּ.  {ר}{ש}

כג שִׁירוּ לַיהוָה, כָּל-הָאָרֶץ–  {ס}  בַּשְּׂרוּ מִיּוֹם-אֶל-יוֹם, יְשׁוּעָתוֹ.  {ר}

כד סַפְּרוּ בַגּוֹיִם, אֶת-כְּבוֹדוֹ–  {ס}  בְּכָל-הָעַמִּים, נִפְלְאֹתָיו.  {ר}

כה כִּי גָדוֹל יְהוָה וּמְהֻלָּל, מְאֹד–  {ס}  וְנוֹרָא הוּא, עַל-כָּל-אֱלֹהִים.  {ר}

כו כִּי כָּל-אֱלֹהֵי הָעַמִּים, אֱלִילִים–  {ס}  וַיהוָה, שָׁמַיִם עָשָׂה.  {ר}

כז הוֹד וְהָדָר, לְפָנָיו–  {ס}  עֹז וְחֶדְוָה, בִּמְקֹמוֹ.  {ר}

כח הָבוּ לַיהוָה, מִשְׁפְּחוֹת עַמִּים–  {ס}  הָבוּ לַיהוָה, כָּבוֹד וָעֹז.  {ר}

כט הָבוּ לַיהוָה, כְּבוֹד שְׁמוֹ;  {ס}  שְׂאוּ מִנְחָה, וּבֹאוּ לְפָנָיו–  {ר} הִשְׁתַּחֲווּ לַיהוָה, בְּהַדְרַת-קֹדֶשׁ.  {ס}

ל חִילוּ מִלְּפָנָיו, כָּל-הָאָרֶץ–  {ר} אַף-תִּכּוֹן תֵּבֵל, בַּל-תִּמּוֹט.  {ס}

לא יִשְׂמְחוּ הַשָּׁמַיִם, וְתָגֵל הָאָרֶץ–  {ר} וְיֹאמְרוּ בַגּוֹיִם, יְהוָה מָלָךְ.  {ס}

לב יִרְעַם הַיָּם, וּמְלוֹאוֹ–  {ר} יַעֲלֹץ הַשָּׂדֶה, וְכָל-אֲשֶׁר-בּוֹ.  {ס}

לג אָז יְרַנְּנוּ, עֲצֵי הַיָּעַר:  {ר} מִלִּפְנֵי יְהוָה–כִּי-בָא, לִשְׁפּוֹט אֶת-הָאָרֶץ.  {ס}

לד הוֹדוּ לַיהוָה, כִּי טוֹב–  {ר} כִּי לְעוֹלָם, חַסְדּוֹ.  {ס}

לה וְאִמְרוּ–הוֹשִׁיעֵנוּ אֱלֹהֵי יִשְׁעֵנוּ,  {ר} וְקַבְּצֵנוּ וְהַצִּילֵנוּ מִן-הַגּוֹיִם:  {ס}  לְהֹדוֹת לְשֵׁם קָדְשֶׁךָ,  {ר} לְהִשְׁתַּבֵּחַ בִּתְהִלָּתֶךָ.  {ס}

לו בָּרוּךְ יְהוָה, אֱלֹהֵי יִשְׂרָאֵל–  {ר} מִן-הָעוֹלָם, וְעַד הָעֹלָם; וַיֹּאמְרוּ כָל-הָעָם, אָמֵן–  {ס}  וְהַלֵּל, לַיהוָה.  {ר}{ש}

לז וַיַּעֲזָב-שָׁם, לִפְנֵי אֲרוֹן בְּרִית-יְהוָה, לְאָסָף, וּלְאֶחָיו:  לְשָׁרֵת לִפְנֵי הָאָרוֹן, תָּמִיד–לִדְבַר-יוֹם בְּיוֹמוֹ.

לח וְעֹבֵד אֱדֹם וַאֲחֵיהֶם, שִׁשִּׁים וּשְׁמוֹנָה;  {ס}  וְעֹבֵד אֱדֹם בֶּן-יְדִיתוּן וְחֹסָה, לְשֹׁעֲרִים.

לט וְאֵת צָדוֹק הַכֹּהֵן, וְאֶחָיו הַכֹּהֲנִים, לִפְנֵי, מִשְׁכַּן יְהוָה–בַּבָּמָה, אֲשֶׁר בְּגִבְעוֹן.

מ לְהַעֲלוֹת עֹלוֹת לַיהוָה עַל-מִזְבַּח הָעֹלָה, תָּמִיד–לַבֹּקֶר וְלָעָרֶב; וּלְכָל-הַכָּתוּב בְּתוֹרַת יְהוָה, אֲשֶׁר צִוָּה עַל-יִשְׂרָאֵל.

מא וְעִמָּהֶם, הֵימָן וִידוּתוּן, וּשְׁאָר הַבְּרוּרִים, אֲשֶׁר נִקְּבוּ בְּשֵׁמוֹת–לְהֹדוֹת, לַיהוָה, כִּי לְעוֹלָם, חַסְדּוֹ.

מב וְעִמָּהֶם הֵימָן וִידוּתוּן חֲצֹצְרוֹת וּמְצִלְתַּיִם, לְמַשְׁמִיעִים, וּכְלֵי, שִׁיר הָאֱלֹהִים; וּבְנֵי יְדוּתוּן, לַשָּׁעַר.

מג וַיֵּלְכוּ כָל-הָעָם, אִישׁ לְבֵיתוֹ; וַיִּסֹּב דָּוִיד, לְבָרֵךְ אֶת-בֵּיתוֹ.  {פ}

Pages:«1...8910111213141516»