The Morning Kollel

Podcast: Play in new window | Download (Duration: 51:38 — 17.7MB)

Subscribe: Email | RSS

א וּכְכַלּוֹת שְׁלֹמֹה, לְהִתְפַּלֵּל, וְהָאֵשׁ יָרְדָה מֵהַשָּׁמַיִם, וַתֹּאכַל הָעֹלָה וְהַזְּבָחִים; וּכְבוֹד יְהוָה, מָלֵא אֶת-הַבָּיִת.

ב וְלֹא יָכְלוּ הַכֹּהֲנִים, לָבוֹא אֶל-בֵּית יְהוָה:  כִּי-מָלֵא כְבוֹד-יְהוָה, אֶת-בֵּית יְהוָה.

ג וְכֹל בְּנֵי יִשְׂרָאֵל, רֹאִים בְּרֶדֶת הָאֵשׁ, וּכְבוֹד יְהוָה, עַל-הַבָּיִת; וַיִּכְרְעוּ אַפַּיִם אַרְצָה עַל-הָרִצְפָה, וַיִּשְׁתַּחֲווּ, וְהֹדוֹת לַיהוָה כִּי טוֹב, כִּי לְעוֹלָם חַסְדּוֹ.

ד וְהַמֶּלֶךְ, וְכָל-הָעָם, זֹבְחִים זֶבַח, לִפְנֵי יְהוָה.  {ס}

ה וַיִּזְבַּח הַמֶּלֶךְ שְׁלֹמֹה, אֶת-זֶבַח הַבָּקָר, עֶשְׂרִים וּשְׁנַיִם אֶלֶף, וְצֹאן מֵאָה וְעֶשְׂרִים אָלֶף; וַיַּחְנְכוּ אֶת-בֵּית הָאֱלֹהִים, הַמֶּלֶךְ וְכָל-הָעָם.

ו וְהַכֹּהֲנִים עַל-מִשְׁמְרוֹתָם עֹמְדִים, וְהַלְוִיִּם בִּכְלֵי-שִׁיר יְהוָה אֲשֶׁר עָשָׂה דָּוִיד הַמֶּלֶךְ לְהֹדוֹת לַיהוָה כִּי-לְעוֹלָם חַסְדּוֹ, בְּהַלֵּל דָּוִיד, בְּיָדָם; וְהַכֹּהֲנִים מחצצרים (מַחְצְרִים) נֶגְדָּם, וְכָל-יִשְׂרָאֵל עֹמְדִים.  {ס}

ז וַיְקַדֵּשׁ שְׁלֹמֹה, אֶת-תּוֹךְ הֶחָצֵר אֲשֶׁר לִפְנֵי בֵית-יְהוָה, כִּי-עָשָׂה שָׁם הָעֹלוֹת, וְאֵת חֶלְבֵי הַשְּׁלָמִים:  כִּי-מִזְבַּח הַנְּחֹשֶׁת, אֲשֶׁר עָשָׂה שְׁלֹמֹה, לֹא יָכוֹל לְהָכִיל אֶת-הָעֹלָה וְאֶת-הַמִּנְחָה, וְאֶת-הַחֲלָבִים.

Podcast: Play in new window | Download (Duration: 1:11:24 — 24.5MB)

Subscribe: Email | RSS

לח וְשָׁבוּ אֵלֶיךָ, בְּכָל-לִבָּם וּבְכָל-נַפְשָׁם, בְּאֶרֶץ שִׁבְיָם, אֲשֶׁר-שָׁבוּ אֹתָם; וְהִתְפַּלְלוּ, דֶּרֶךְ אַרְצָם אֲשֶׁר נָתַתָּה לַאֲבוֹתָם, וְהָעִיר אֲשֶׁר בָּחַרְתָּ, וְלַבַּיִת אֲשֶׁר-בָּנִיתִי לִשְׁמֶךָ.

לט וְשָׁמַעְתָּ מִן-הַשָּׁמַיִם מִמְּכוֹן שִׁבְתְּךָ, אֶת-תְּפִלָּתָם וְאֶת-תְּחִנֹּתֵיהֶם, וְעָשִׂיתָ, מִשְׁפָּטָם; וְסָלַחְתָּ לְעַמְּךָ, אֲשֶׁר חָטְאוּ-לָךְ.

מ עַתָּה אֱלֹהַי, יִהְיוּ-נָא עֵינֶיךָ פְּתֻחוֹת, וְאָזְנֶיךָ, קַשֻּׁבוֹת–לִתְפִלַּת, הַמָּקוֹם הַזֶּה.  {ס}

מא וְעַתָּה, קוּמָה יְהוָה אֱלֹהִים לְנוּחֶךָ–אַתָּה, וַאֲרוֹן עֻזֶּךָ; כֹּהֲנֶיךָ יְהוָה אֱלֹהִים, יִלְבְּשׁוּ תְשׁוּעָה, וַחֲסִידֶיךָ, יִשְׂמְחוּ בַטּוֹב.

מב יְהוָה אֱלֹהִים, אַל-תָּשֵׁב פְּנֵי מְשִׁיחֶךָ:  זָכְרָה, לְחַסְדֵי דָּוִיד עַבְדֶּךָ.  {פ}

Podcast: Play in new window | Download (Duration: 1:06:53 — 23.0MB)

Subscribe: Email | RSS

כו בְּהֵעָצֵר הַשָּׁמַיִם וְלֹא-יִהְיֶה מָטָר, כִּי יֶחֶטְאוּ-לָךְ; וְהִתְפַּלְלוּ אֶל-הַמָּקוֹם הַזֶּה, וְהוֹדוּ אֶת-שְׁמֶךָ–מֵחַטָּאתָם יְשׁוּבוּן, כִּי תַעֲנֵם.

כז וְאַתָּה תִּשְׁמַע הַשָּׁמַיִם, וְסָלַחְתָּ לְחַטַּאת עֲבָדֶיךָ וְעַמְּךָ יִשְׂרָאֵל–כִּי תוֹרֵם אֶל-הַדֶּרֶךְ הַטּוֹבָה, אֲשֶׁר יֵלְכוּ-בָהּ; וְנָתַתָּה מָטָר עַל-אַרְצְךָ, אֲשֶׁר-נָתַתָּה לְעַמְּךָ לְנַחֲלָה.  {ס}

כח רָעָב כִּי-יִהְיֶה בָאָרֶץ, דֶּבֶר כִּי-יִהְיֶה שִׁדָּפוֹן וְיֵרָקוֹן אַרְבֶּה וְחָסִיל כִּי יִהְיֶה, כִּי יָצַר-לוֹ אֹיְבָיו, בְּאֶרֶץ שְׁעָרָיו:  כָּל-נֶגַע, וְכָל-מַחֲלָה.

כט כָּל-תְּפִלָּה כָל-תְּחִנָּה, אֲשֶׁר יִהְיֶה לְכָל-הָאָדָם, וּלְכֹל, עַמְּךָ יִשְׂרָאֵל–אֲשֶׁר יֵדְעוּ, אִישׁ נִגְעוֹ וּמַכְאֹבוֹ, וּפָרַשׂ כַּפָּיו, אֶל-הַבַּיִת הַזֶּה.

ל וְאַתָּה תִּשְׁמַע מִן-הַשָּׁמַיִם מְכוֹן שִׁבְתֶּךָ, וְסָלַחְתָּ, וְנָתַתָּה לָאִישׁ כְּכָל-דְּרָכָיו, אֲשֶׁר תֵּדַע אֶת-לְבָבוֹ:  כִּי אַתָּה לְבַדְּךָ יָדַעְתָּ, אֶת-לְבַב בְּנֵי הָאָדָם.

לא לְמַעַן יִירָאוּךָ, לָלֶכֶת בִּדְרָכֶיךָ, כָּל-הַיָּמִים, אֲשֶׁר-הֵם חַיִּים עַל-פְּנֵי הָאֲדָמָה–אֲשֶׁר נָתַתָּה, לַאֲבֹתֵינוּ.  {ס}

לב וְגַם אֶל-הַנָּכְרִי, אֲשֶׁר לֹא מֵעַמְּךָ יִשְׂרָאֵל הוּא, וּבָא מֵאֶרֶץ רְחוֹקָה לְמַעַן שִׁמְךָ הַגָּדוֹל וְיָדְךָ הַחֲזָקָה, וּזְרוֹעֲךָ הַנְּטוּיָה; וּבָאוּ וְהִתְפַּלְלוּ, אֶל-הַבַּיִת הַזֶּה.

לג וְאַתָּה תִּשְׁמַע מִן-הַשָּׁמַיִם, מִמְּכוֹן שִׁבְתֶּךָ, וְעָשִׂיתָ, כְּכֹל אֲשֶׁר-יִקְרָא אֵלֶיךָ הַנָּכְרִי:  לְמַעַן יֵדְעוּ כָל-עַמֵּי הָאָרֶץ אֶת-שְׁמֶךָ, וּלְיִרְאָה אֹתְךָ כְּעַמְּךָ יִשְׂרָאֵל, וְלָדַעַת, כִּי-שִׁמְךָ נִקְרָא עַל-הַבַּיִת הַזֶּה אֲשֶׁר בָּנִיתִי.

לד כִּי-יֵצֵא עַמְּךָ לַמִּלְחָמָה עַל-אֹיְבָיו, בַּדֶּרֶךְ אֲשֶׁר תִּשְׁלָחֵם; וְהִתְפַּלְלוּ אֵלֶיךָ, דֶּרֶךְ הָעִיר הַזֹּאת אֲשֶׁר בָּחַרְתָּ בָּהּ, וְהַבַּיִת, אֲשֶׁר-בָּנִיתִי לִשְׁמֶךָ.

לה וְשָׁמַעְתָּ, מִן-הַשָּׁמַיִם, אֶת-תְּפִלָּתָם, וְאֶת-תְּחִנָּתָם; וְעָשִׂיתָ, מִשְׁפָּטָם.

לו כִּי יֶחֶטְאוּ-לָךְ, כִּי אֵין אָדָם אֲשֶׁר לֹא-יֶחֱטָא, וְאָנַפְתָּ בָם, וּנְתַתָּם לִפְנֵי אוֹיֵב; וְשָׁבוּם שׁוֹבֵיהֶם אֶל-אֶרֶץ רְחוֹקָה, אוֹ קְרוֹבָה.

לז וְהֵשִׁיבוּ, אֶל-לְבָבָם, בָּאָרֶץ, אֲשֶׁר נִשְׁבּוּ-שָׁם; וְשָׁבוּ וְהִתְחַנְּנוּ אֵלֶיךָ, בְּאֶרֶץ שִׁבְיָם לֵאמֹר, חָטָאנוּ הֶעֱוִינוּ, וְרָשָׁעְנוּ.

Podcast: Play in new window | Download (Duration: 1:04:42 — 22.2MB)

Subscribe: Email | RSS

יט וּפָנִיתָ אֶל-תְּפִלַּת עַבְדְּךָ, וְאֶל-תְּחִנָּתוֹ–יְהוָה אֱלֹהָי:  לִשְׁמֹעַ אֶל-הָרִנָּה וְאֶל-הַתְּפִלָּה, אֲשֶׁר עַבְדְּךָ מִתְפַּלֵּל לְפָנֶיךָ.

כ לִהְיוֹת עֵינֶיךָ פְתֻחוֹת אֶל-הַבַּיִת הַזֶּה, יוֹמָם וָלַיְלָה–אֶל-הַמָּקוֹם, אֲשֶׁר אָמַרְתָּ לָשׂוּם שִׁמְךָ שָׁם:  לִשְׁמוֹעַ, אֶל-הַתְּפִלָּה, אֲשֶׁר יִתְפַּלֵּל עַבְדְּךָ, אֶל-הַמָּקוֹם הַזֶּה.

כא וְשָׁמַעְתָּ אֶל-תַּחֲנוּנֵי עַבְדְּךָ, וְעַמְּךָ יִשְׂרָאֵל, אֲשֶׁר יִתְפַּלְלוּ, אֶל-הַמָּקוֹם הַזֶּה; וְאַתָּה תִּשְׁמַע מִמְּקוֹם שִׁבְתְּךָ, מִן-הַשָּׁמַיִם–וְשָׁמַעְתָּ, וְסָלָחְתָּ.

כב אִם-יֶחֱטָא אִישׁ לְרֵעֵהוּ, וְנָשָׁא-בוֹ אָלָה לְהַאֲלֹתוֹ; וּבָא, אָלָה לִפְנֵי מִזְבַּחֲךָ–בַּבַּיִת הַזֶּה.

כג וְאַתָּה תִּשְׁמַע מִן-הַשָּׁמַיִם, וְעָשִׂיתָ וְשָׁפַטְתָּ אֶת-עֲבָדֶיךָ, לְהָשִׁיב לְרָשָׁע, לָתֵת דַּרְכּוֹ בְּרֹאשׁוֹ; וּלְהַצְדִּיק צַדִּיק, לָתֶת לוֹ כְּצִדְקָתוֹ.  {ס}

כד וְאִם-יִנָּגֵף עַמְּךָ יִשְׂרָאֵל, לִפְנֵי אוֹיֵב–כִּי יֶחֶטְאוּ-לָךְ; וְשָׁבוּ וְהוֹדוּ אֶת-שְׁמֶךָ, וְהִתְפַּלְלוּ וְהִתְחַנְּנוּ לְפָנֶיךָ בַּבַּיִת הַזֶּה.

כה וְאַתָּה, תִּשְׁמַע מִן-הַשָּׁמַיִם, וְסָלַחְתָּ, לְחַטַּאת עַמְּךָ יִשְׂרָאֵל; וַהֲשֵׁיבוֹתָם, אֶל-הָאֲדָמָה, אֲשֶׁר-נָתַתָּה לָהֶם, וְלַאֲבֹתֵיהֶם.  {פ}

Podcast: Play in new window | Download (Duration: 58:59 — 20.3MB)

Subscribe: Email | RSS

א אָז, אָמַר שְׁלֹמֹה:  יְהוָה אָמַר, לִשְׁכּוֹן בָּעֲרָפֶל.

ב וַאֲנִי בָּנִיתִי בֵית-זְבֻל, לָךְ; וּמָכוֹן לְשִׁבְתְּךָ, עוֹלָמִים.

ג וַיַּסֵּב הַמֶּלֶךְ, אֶת-פָּנָיו, וַיְבָרֶךְ, אֵת כָּל-קְהַל יִשְׂרָאֵל; וְכָל-קְהַל יִשְׂרָאֵל, עוֹמֵד.

ד וַיֹּאמֶר, בָּרוּךְ יְהוָה אֱלֹהֵי יִשְׂרָאֵל, אֲשֶׁר דִּבֶּר בְּפִיו, אֵת דָּוִיד אָבִי; וּבְיָדָיו מִלֵּא, לֵאמֹר.

ה מִן-הַיּוֹם, אֲשֶׁר הוֹצֵאתִי אֶת-עַמִּי מֵאֶרֶץ מִצְרַיִם, לֹא-בָחַרְתִּי בְעִיר מִכֹּל שִׁבְטֵי יִשְׂרָאֵל, לִבְנוֹת בַּיִת לִהְיוֹת שְׁמִי שָׁם; וְלֹא-בָחַרְתִּי בְאִישׁ, לִהְיוֹת נָגִיד עַל-עַמִּי יִשְׂרָאֵל.

ו וָאֶבְחַר, בִּירוּשָׁלִַם, לִהְיוֹת שְׁמִי, שָׁם; וָאֶבְחַר בְּדָוִיד, לִהְיוֹת עַל-עַמִּי יִשְׂרָאֵל.

ז וַיְהִי, עִם-לְבַב דָּוִיד אָבִי, לִבְנוֹת בַּיִת, לְשֵׁם יְהוָה אֱלֹהֵי יִשְׂרָאֵל.

ח וַיֹּאמֶר יְהוָה, אֶל-דָּוִיד אָבִי, יַעַן אֲשֶׁר הָיָה עִם-לְבָבְךָ, לִבְנוֹת בַּיִת לִשְׁמִי–הֱטִיבוֹתָ, כִּי הָיָה עִם-לְבָבֶךָ.

ט רַק אַתָּה, לֹא תִבְנֶה הַבָּיִת:  כִּי בִנְךָ הַיּוֹצֵא מֵחֲלָצֶיךָ, הוּא-יִבְנֶה הַבַּיִת לִשְׁמִי.

י וַיָּקֶם יְהוָה, אֶת-דְּבָרוֹ אֲשֶׁר דִּבֵּר; וָאָקוּם תַּחַת דָּוִיד אָבִי וָאֵשֵׁב עַל-כִּסֵּא יִשְׂרָאֵל, כַּאֲשֶׁר דִּבֶּר יְהוָה, וָאֶבְנֶה הַבַּיִת, לְשֵׁם יְהוָה אֱלֹהֵי יִשְׂרָאֵל.

יא וָאָשִׂים שָׁם אֶת-הָאָרוֹן, אֲשֶׁר-שָׁם בְּרִית יְהוָה, אֲשֶׁר כָּרַת, עִם-בְּנֵי יִשְׂרָאֵל.

יב וַיַּעֲמֹד, לִפְנֵי מִזְבַּח יְהוָה, נֶגֶד, כָּל-קְהַל יִשְׂרָאֵל; וַיִּפְרֹשׂ, כַּפָּיו.

יג כִּי-עָשָׂה שְׁלֹמֹה כִּיּוֹר נְחֹשֶׁת, וַיִּתְּנֵהוּ בְּתוֹךְ הָעֲזָרָה–חָמֵשׁ אַמּוֹת אָרְכּוֹ וְחָמֵשׁ אַמּוֹת רָחְבּוֹ, וְאַמּוֹת שָׁלוֹשׁ קוֹמָתוֹ; וַיַּעֲמֹד עָלָיו, וַיִּבְרַךְ עַל-בִּרְכָּיו נֶגֶד כָּל-קְהַל יִשְׂרָאֵל, וַיִּפְרֹשׂ כַּפָּיו, הַשָּׁמָיְמָה.  {פ}

יד וַיֹּאמַר,  {פ} יְהוָה אֱלֹהֵי יִשְׂרָאֵל אֵין-כָּמוֹךָ אֱלֹהִים–בַּשָּׁמַיִם, וּבָאָרֶץ:  שֹׁמֵר הַבְּרִית, וְהַחֶסֶד, לַעֲבָדֶיךָ, הַהֹלְכִים לְפָנֶיךָ בְּכָל-לִבָּם.

טו אֲשֶׁר שָׁמַרְתָּ, לְעַבְדְּךָ דָּוִיד אָבִי, אֵת אֲשֶׁר-דִּבַּרְתָּ, לוֹ; וַתְּדַבֵּר בְּפִיךָ וּבְיָדְךָ מִלֵּאתָ, כַּיּוֹם הַזֶּה.

טז וְעַתָּה יְהוָה אֱלֹהֵי יִשְׂרָאֵל, שְׁמֹר לְעַבְדְּךָ דָוִיד אָבִי אֵת אֲשֶׁר דִּבַּרְתָּ לּוֹ לֵאמֹר, לֹא-יִכָּרֵת לְךָ אִישׁ מִלְּפָנַי, יוֹשֵׁב עַל-כִּסֵּא יִשְׂרָאֵל:  רַק אִם-יִשְׁמְרוּ בָנֶיךָ אֶת-דַּרְכָּם, לָלֶכֶת בְּתוֹרָתִי, כַּאֲשֶׁר הָלַכְתָּ, לְפָנָי.

יז וְעַתָּה, יְהוָה אֱלֹהֵי יִשְׂרָאֵל:  יֵאָמֵן, דְּבָרְךָ, אֲשֶׁר דִּבַּרְתָּ, לְעַבְדְּךָ לְדָוִיד.

יח כִּי, הַאֻמְנָם, יֵשֵׁב אֱלֹהִים אֶת-הָאָדָם, עַל-הָאָרֶץ:  הִנֵּה שָׁמַיִם וּשְׁמֵי הַשָּׁמַיִם, לֹא יְכַלְכְּלוּךָ–אַף, כִּי-הַבַּיִת הַזֶּה אֲשֶׁר בָּנִיתִי.

Podcast: Play in new window | Download (Duration: 49:12 — 16.9MB)

Subscribe: Email | RSS

ח וַיִּהְיוּ הַכְּרוּבִים פֹּרְשִׂים כְּנָפַיִם, עַל-מְקוֹם הָאָרוֹן; וַיְכַסּוּ הַכְּרוּבִים עַל-הָאָרוֹן וְעַל-בַּדָּיו, מִלְמָעְלָה.

ט וַיַּאֲרִיכוּ, הַבַּדִּים, וַיֵּרָאוּ רָאשֵׁי הַבַּדִּים מִן-הָאָרוֹן עַל-פְּנֵי הַדְּבִיר, וְלֹא יֵרָאוּ הַחוּצָה; וַיְהִי-שָׁם, עַד הַיּוֹם הַזֶּה.

י אֵין, בָּאָרוֹן–רַק שְׁנֵי הַלֻּחוֹת, אֲשֶׁר-נָתַן מֹשֶׁה בְּחֹרֵב:  אֲשֶׁר כָּרַת יְהוָה עִם-בְּנֵי יִשְׂרָאֵל, בְּצֵאתָם מִמִּצְרָיִם.  {פ}

יא וַיְהִי, בְּצֵאת הַכֹּהֲנִים מִן-הַקֹּדֶשׁ:  כִּי כָּל-הַכֹּהֲנִים הַנִּמְצְאִים, הִתְקַדָּשׁוּ–אֵין, לִשְׁמוֹר לְמַחְלְקוֹת.

יב וְהַלְוִיִּם הַמְשֹׁרְרִים לְכֻלָּם לְאָסָף לְהֵימָן לִידֻתוּן וְלִבְנֵיהֶם וְלַאֲחֵיהֶם מְלֻבָּשִׁים בּוּץ, בִּמְצִלְתַּיִם וּבִנְבָלִים וְכִנֹּרוֹת, עֹמְדִים, מִזְרָח לַמִּזְבֵּחַ; וְעִמָּהֶם כֹּהֲנִים לְמֵאָה וְעֶשְׂרִים, מחצררים (מַחְצְרִים) בַּחֲצֹצְרוֹת.

יג וַיְהִי כְאֶחָד למחצצרים (לַמְחַצְּרִים) וְלַמְשֹׁרְרִים לְהַשְׁמִיעַ קוֹל-אֶחָד, לְהַלֵּל וּלְהֹדוֹת לַיהוָה, וּכְהָרִים קוֹל בַּחֲצֹצְרוֹת וּבִמְצִלְתַּיִם וּבִכְלֵי הַשִּׁיר וּבְהַלֵּל לַיהוָה כִּי טוֹב, כִּי לְעוֹלָם חַסְדּוֹ; וְהַבַּיִת מָלֵא עָנָן, בֵּית יְהוָה.

יד וְלֹא-יָכְלוּ הַכֹּהֲנִים לַעֲמוֹד לְשָׁרֵת, מִפְּנֵי הֶעָנָן:  כִּי-מָלֵא כְבוֹד-יְהוָה, אֶת-בֵּית הָאֱלֹהִים.  {פ}

Podcast: Play in new window | Download (Duration: 1:07:48 — 23.3MB)

Subscribe: Email | RSS

ג וַיִּקָּהֲלוּ אֶל-הַמֶּלֶךְ כָּל-אִישׁ יִשְׂרָאֵל, בֶּחָג:  הוּא, הַחֹדֶשׁ הַשְּׁבִעִי.

ד וַיָּבֹאוּ, כֹּל זִקְנֵי יִשְׂרָאֵל; וַיִּשְׂאוּ הַלְוִיִּם, אֶת-הָאָרוֹן.

ה וַיַּעֲלוּ אֶת-הָאָרוֹן וְאֶת-אֹהֶל מוֹעֵד, וְאֶת-כָּל-כְּלֵי הַקֹּדֶשׁ אֲשֶׁר בָּאֹהֶל:  הֶעֱלוּ אֹתָם, הַכֹּהֲנִים הַלְוִיִּם.

ו וְהַמֶּלֶךְ שְׁלֹמֹה, וְכָל-עֲדַת יִשְׂרָאֵל הַנּוֹעָדִים עָלָיו–לִפְנֵי הָאָרוֹן:  מְזַבְּחִים צֹאן וּבָקָר, אֲשֶׁר לֹא-יִסָּפְרוּ וְלֹא יִמָּנוּ מֵרֹב.

ז וַיָּבִיאוּ הַכֹּהֲנִים אֶת-אֲרוֹן בְּרִית-יְהוָה אֶל-מְקוֹמוֹ, אֶל-דְּבִיר הַבַּיִת–אֶל-קֹדֶשׁ הַקֳּדָשִׁים:  אֶל-תַּחַת, כַּנְפֵי הַכְּרוּבִים.

ח וַיִּהְיוּ הַכְּרוּבִים פֹּרְשִׂים כְּנָפַיִם, עַל-מְקוֹם הָאָרוֹן; וַיְכַסּוּ הַכְּרוּבִים עַל-הָאָרוֹן וְעַל-בַּדָּיו, מִלְמָעְלָה.

ט וַיַּאֲרִיכוּ, הַבַּדִּים, וַיֵּרָאוּ רָאשֵׁי הַבַּדִּים מִן-הָאָרוֹן עַל-פְּנֵי הַדְּבִיר, וְלֹא יֵרָאוּ הַחוּצָה; וַיְהִי-שָׁם, עַד הַיּוֹם הַזֶּה.

י אֵין, בָּאָרוֹן–רַק שְׁנֵי הַלֻּחוֹת, אֲשֶׁר-נָתַן מֹשֶׁה בְּחֹרֵב:  אֲשֶׁר כָּרַת יְהוָה עִם-בְּנֵי יִשְׂרָאֵל, בְּצֵאתָם מִמִּצְרָיִם.  {פ}

Podcast: Play in new window | Download (Duration: 1:07:44 — 23.3MB)

Subscribe: Email | RSS

א וַתִּשְׁלַם, כָּל-הַמְּלָאכָה, אֲשֶׁר-עָשָׂה שְׁלֹמֹה, לְבֵית יְהוָה;  {ס}  וַיָּבֵא שְׁלֹמֹה אֶת-קָדְשֵׁי דָּוִיד אָבִיו, וְאֶת-הַכֶּסֶף וְאֶת-הַזָּהָב וְאֶת-כָּל-הַכֵּלִים–נָתַן, בְּאֹצְרוֹת בֵּית הָאֱלֹהִים.  {פ}

ב אָז יַקְהֵיל שְׁלֹמֹה אֶת-זִקְנֵי יִשְׂרָאֵל, וְאֶת-כָּל-רָאשֵׁי הַמַּטּוֹת נְשִׂיאֵי הָאָבוֹת לִבְנֵי יִשְׂרָאֵל–אֶל-יְרוּשָׁלִָם:  לְהַעֲלוֹת אֶת-אֲרוֹן בְּרִית-יְהוָה, מֵעִיר דָּוִיד–הִיא צִיּוֹן.

Podcast: Play in new window | Download (Duration: 1:09:58 — 24.0MB)

Subscribe: Email | RSS

יד וְאֶת-הַמְּכֹנוֹת, עָשָׂה; וְאֶת-הַכִּיֹּרוֹת עָשָׂה, עַל-הַמְּכֹנוֹת.

טו אֶת-הַיָּם, אֶחָד; וְאֶת-הַבָּקָר שְׁנֵים-עָשָׂר, תַּחְתָּיו.

טז וְאֶת-הַסִּירוֹת וְאֶת-הַיָּעִים וְאֶת-הַמִּזְלָגוֹת, וְאֶת-כָּל-כְּלֵיהֶם, עָשָׂה חוּרָם אָבִיו לַמֶּלֶךְ שְׁלֹמֹה, לְבֵית יְהוָה–נְחֹשֶׁת, מָרוּק.

יז בְּכִכַּר הַיַּרְדֵּן יְצָקָם הַמֶּלֶךְ, בַּעֲבִי הָאֲדָמָה, בֵּין סֻכּוֹת, וּבֵין צְרֵדָתָה.

יח וַיַּעַשׂ שְׁלֹמֹה כָּל-הַכֵּלִים הָאֵלֶּה, לָרֹב מְאֹד:  כִּי לֹא נֶחְקַר, מִשְׁקַל הַנְּחֹשֶׁת.  {ס}

יט וַיַּעַשׂ שְׁלֹמֹה–אֵת כָּל-הַכֵּלִים, אֲשֶׁר בֵּית הָאֱלֹהִים; וְאֵת, מִזְבַּח הַזָּהָב, וְאֶת-הַשֻּׁלְחָנוֹת, וַעֲלֵיהֶם לֶחֶם הַפָּנִים.

כ וְאֶת-הַמְּנֹרוֹת וְנֵרֹתֵיהֶם, לְבַעֲרָם כַּמִּשְׁפָּט לִפְנֵי הַדְּבִיר–זָהָב סָגוּר.

כא וְהַפֶּרַח וְהַנֵּרוֹת וְהַמֶּלְקַחַיִם, זָהָב; הוּא, מִכְלוֹת זָהָב.

כב וְהַמְזַמְּרוֹת וְהַמִּזְרָקוֹת וְהַכַּפּוֹת וְהַמַּחְתּוֹת, זָהָב סָגוּר; וּפֶתַח הַבַּיִת דַּלְתוֹתָיו הַפְּנִימִיּוֹת לְקֹדֶשׁ הַקֳּדָשִׁים, וְדַלְתֵי הַבַּיִת לַהֵיכָל–זָהָב.

Podcast: Play in new window | Download (Duration: 56:43 — 19.5MB)

Subscribe: Email | RSS

ו וַיַּעַשׂ כִּיּוֹרִים, עֲשָׂרָה, וַיִּתֵּן חֲמִשָּׁה מִיָּמִין וַחֲמִשָּׁה מִשְּׂמֹאול לְרָחְצָה בָהֶם, אֶת-מַעֲשֵׂה הָעוֹלָה יָדִיחוּ בָם; וְהַיָּם, לְרָחְצָה לַכֹּהֲנִים בּוֹ.  {ס}

ז וַיַּעַשׂ אֶת-מְנֹרוֹת הַזָּהָב, עֶשֶׂר–כְּמִשְׁפָּטָם; וַיִּתֵּן, בַּהֵיכָל, חָמֵשׁ מִיָּמִין, וְחָמֵשׁ מִשְּׂמֹאול.  {ס}

ח וַיַּעַשׂ שֻׁלְחָנוֹת, עֲשָׂרָה, וַיַּנַּח בַּהֵיכָל, חֲמִשָּׁה מִיָּמִין וַחֲמִשָּׁה מִשְּׂמֹאול; וַיַּעַשׂ מִזְרְקֵי זָהָב, מֵאָה.  {ס}

ט וַיַּעַשׂ חֲצַר הַכֹּהֲנִים, וְהָעֲזָרָה הַגְּדוֹלָה; וּדְלָתוֹת לָעֲזָרָה וְדַלְתוֹתֵיהֶם, צִפָּה נְחֹשֶׁת.

י וְאֶת-הַיָּם, נָתַן מִכֶּתֶף הַיְמָנִית קֵדְמָה–מִמּוּל נֶגְבָּה.

יא וַיַּעַשׂ חוּרָם–אֶת-הַסִּירוֹת, וְאֶת-הַיָּעִים וְאֶת-הַמִּזְרָקוֹת; וַיְכַל חירם (חוּרָם), לַעֲשׂוֹת אֶת-הַמְּלָאכָה, אֲשֶׁר עָשָׂה לַמֶּלֶךְ שְׁלֹמֹה, בְּבֵית הָאֱלֹהִים.

יב עַמּוּדִים שְׁנַיִם, וְהַגֻּלּוֹת וְהַכֹּתָרוֹת עַל-רֹאשׁ הָעַמּוּדִים שְׁתָּיִם; וְהַשְּׂבָכוֹת שְׁתַּיִם–לְכַסּוֹת אֶת-שְׁתֵּי גֻּלּוֹת הַכֹּתָרוֹת, אֲשֶׁר עַל-רֹאשׁ הָעַמּוּדִים.

יג וְאֶת-הָרִמּוֹנִים אַרְבַּע מֵאוֹת, לִשְׁתֵּי הַשְּׂבָכוֹת; שְׁנַיִם טוּרִים רִמּוֹנִים, לַשְּׂבָכָה הָאֶחָת–לְכַסּוֹת אֶת-שְׁתֵּי גֻּלּוֹת הַכֹּתָרוֹת, אֲשֶׁר עַל-פְּנֵי הָעַמּוּדִים.