Articles by " admin"
Oct 30, 2013 - Divrei Hayamim    No Comments

Divrei Hayamim I 29:22

Play

Podcast: Play in new window | Download (Duration: 1:06:50 — 22.9MB)

Subscribe: Email | RSS

כב וַיֹּאכְלוּ וַיִּשְׁתּוּ לִפְנֵי יְהוָה, בַּיּוֹם הַהוּא–בְּשִׂמְחָה גְדוֹלָה; וַיַּמְלִיכוּ שֵׁנִית לִשְׁלֹמֹה בֶן-דָּוִיד, וַיִּמְשְׁחוּ לַיהוָה לְנָגִיד וּלְצָדוֹק לְכֹהֵן.

כג וַיֵּשֶׁב שְׁלֹמֹה עַל-כִּסֵּא יְהוָה לְמֶלֶךְ, תַּחַת-דָּוִיד אָבִיו–וַיַּצְלַח; וַיִּשְׁמְעוּ אֵלָיו, כָּל-יִשְׂרָאֵל.

כד וְכָל-הַשָּׂרִים, וְהַגִּבֹּרִים, וְגַם, כָּל-בְּנֵי הַמֶּלֶךְ דָּוִיד–נָתְנוּ יָד, תַּחַת שְׁלֹמֹה הַמֶּלֶךְ.

כה וַיְגַדֵּל יְהוָה אֶת-שְׁלֹמֹה לְמַעְלָה, לְעֵינֵי כָּל-יִשְׂרָאֵל; וַיִּתֵּן עָלָיו, הוֹד מַלְכוּת, אֲשֶׁר לֹא-הָיָה עַל-כָּל-מֶלֶךְ לְפָנָיו, עַל-יִשְׂרָאֵל.  {פ}

כו וְדָוִיד, בֶּן-יִשָׁי, מָלַךְ, עַל-כָּל-יִשְׂרָאֵל.

כז וְהַיָּמִים, אֲשֶׁר מָלַךְ עַל-יִשְׂרָאֵל–אַרְבָּעִים, שָׁנָה:  בְּחֶבְרוֹן מָלַךְ שֶׁבַע שָׁנִים, וּבִירוּשָׁלִַם מָלַךְ שְׁלֹשִׁים וְשָׁלוֹשׁ.

כח וַיָּמָת בְּשֵׂיבָה טוֹבָה, שְׂבַע יָמִים עֹשֶׁר וְכָבוֹד; וַיִּמְלֹךְ שְׁלֹמֹה בְנוֹ, תַּחְתָּיו.

כט וְדִבְרֵי דָּוִיד הַמֶּלֶךְ, הָרִאשֹׁנִים וְהָאַחֲרֹנִים–הִנָּם כְּתוּבִים, עַל-דִּבְרֵי שְׁמוּאֵל הָרֹאֶה, וְעַל-דִּבְרֵי נָתָן הַנָּבִיא, וְעַל-דִּבְרֵי גָּד הַחֹזֶה.

ל עִם כָּל-מַלְכוּתוֹ, וּגְבוּרָתוֹ; וְהָעִתִּים, אֲשֶׁר עָבְרוּ עָלָיו וְעַל-יִשְׂרָאֵל, וְעַל, כָּל-מַמְלְכוֹת הָאֲרָצוֹת.  {פ}

Oct 29, 2013 - Divrei Hayamim    No Comments

Divrei Hayamim I 29:16

Play

Podcast: Play in new window | Download (Duration: 1:06:03 — 22.7MB)

Subscribe: Email | RSS

טז יְהוָה אֱלֹהֵינוּ–כֹּל הֶהָמוֹן הַזֶּה אֲשֶׁר הֲכִינֹנוּ, לִבְנוֹת-לְךָ בַיִת לְשֵׁם קָדְשֶׁךָ:  מִיָּדְךָ היא (הוּא), וּלְךָ הַכֹּל.

יז וְיָדַעְתִּי אֱלֹהַי–כִּי אַתָּה בֹּחֵן לֵבָב, וּמֵישָׁרִים תִּרְצֶה; אֲנִי, בְּיֹשֶׁר לְבָבִי הִתְנַדַּבְתִּי כָל-אֵלֶּה, וְעַתָּה עַמְּךָ הַנִּמְצְאוּ-פֹה, רָאִיתִי בְשִׂמְחָה לְהִתְנַדֶּב-לָךְ.

יח יְהוָה, אֱלֹהֵי אַבְרָהָם יִצְחָק וְיִשְׂרָאֵל אֲבֹתֵינוּ, שָׁמְרָה-זֹּאת לְעוֹלָם, לְיֵצֶר מַחְשְׁבוֹת לְבַב עַמֶּךָ; וְהָכֵן לְבָבָם, אֵלֶיךָ.

יט וְלִשְׁלֹמֹה בְנִי, תֵּן לֵבָב שָׁלֵם, לִשְׁמוֹר מִצְו‍ֹתֶיךָ, עֵדְו‍ֹתֶיךָ וְחֻקֶּיךָ; וְלַעֲשׂוֹת הַכֹּל, וְלִבְנוֹת הַבִּירָה אֲשֶׁר-הֲכִינוֹתִי.  {פ}

כ וַיֹּאמֶר דָּוִיד לְכָל-הַקָּהָל, בָּרְכוּ-נָא אֶת-יְהוָה אֱלֹהֵיכֶם; וַיְבָרְכוּ כָל-הַקָּהָל, לַיהוָה אֱלֹהֵי אֲבֹתֵיהֶם, וַיִּקְּדוּ וַיִּשְׁתַּחֲווּ לַיהוָה, וְלַמֶּלֶךְ.

כא וַיִּזְבְּחוּ לַיהוָה זְבָחִים וַיַּעֲלוּ עֹלוֹת לַיהוָה, לְמָחֳרַת הַיּוֹם הַהוּא–פָּרִים אֶלֶף אֵלִים אֶלֶף כְּבָשִׂים אֶלֶף, וְנִסְכֵּיהֶם; וּזְבָחִים לָרֹב, לְכָל-יִשְׂרָאֵל.

Pages:«1...473474475476477478479...610»