The Morning Kollel

Podcast: Play in new window | Download (Duration: 49:52 — 17.1MB)

Subscribe: Email | RSS

א וַיַּעַשׂ-לוֹ בָתִּים, בְּעִיר דָּוִיד; וַיָּכֶן מָקוֹם לַאֲרוֹן הָאֱלֹהִים, וַיֶּט-לוֹ אֹהֶל.

ב אָז, אָמַר דָּוִיד, לֹא לָשֵׂאת אֶת-אֲרוֹן הָאֱלֹהִים, כִּי אִם-הַלְוִיִּם:  כִּי-בָם בָּחַר יְהוָה, לָשֵׂאת אֶת-אֲרוֹן יְהוָה וּלְשָׁרְתוֹ–עַד-עוֹלָם.  {פ}

ג וַיַּקְהֵל דָּוִיד אֶת-כָּל-יִשְׂרָאֵל, אֶל-יְרוּשָׁלִָם, לְהַעֲלוֹת אֶת-אֲרוֹן יְהוָה, אֶל-מְקוֹמוֹ אֲשֶׁר-הֵכִין לוֹ.

ד וַיֶּאֱסֹף דָּוִיד אֶת-בְּנֵי אַהֲרֹן, וְאֶת-הַלְוִיִּם.  {ס}

ה לִבְנֵי, קְהָת–אוּרִיאֵל הַשָּׂר, וְאֶחָיו מֵאָה וְעֶשְׂרִים.  {ס}

ו לִבְנֵי, מְרָרִי–עֲשָׂיָה הַשָּׂר, וְאֶחָיו מָאתַיִם וְעֶשְׂרִים.  {ס}

ז לִבְנֵי, גֵּרְשׁוֹם–יוֹאֵל הַשָּׂר, וְאֶחָיו מֵאָה וּשְׁלֹשִׁים.  {ס}

ח לִבְנֵי, אֱלִיצָפָן–שְׁמַעְיָה הַשָּׂר, וְאֶחָיו מָאתָיִם.  {ס}

ט לִבְנֵי, חֶבְרוֹן–אֱלִיאֵל הַשָּׂר, וְאֶחָיו שְׁמוֹנִים.  {ס}

י לִבְנֵי, עֻזִּיאֵל:  עַמִּינָדָב הַשָּׂר–וְאֶחָיו, מֵאָה וּשְׁנֵים עָשָׂר.  {פ}

יא וַיִּקְרָא דָוִיד, לְצָדוֹק וּלְאֶבְיָתָר הַכֹּהֲנִים; וְלַלְוִיִּם, לְאוּרִיאֵל עֲשָׂיָה וְיוֹאֵל שְׁמַעְיָה, וֶאֱלִיאֵל, וְעַמִּינָדָב.  {ס}

יב וַיֹּאמֶר לָהֶם, אַתֶּם רָאשֵׁי הָאָבוֹת לַלְוִיִּם; הִתְקַדְּשׁוּ, אַתֶּם וַאֲחֵיכֶם, וְהַעֲלִיתֶם אֵת אֲרוֹן יְהוָה אֱלֹהֵי יִשְׂרָאֵל, אֶל-הֲכִינוֹתִי לוֹ.

יג כִּי לְמַבָּרִאשׁוֹנָה, לֹא אַתֶּם–פָּרַץ יְהוָה אֱלֹהֵינוּ בָּנוּ, כִּי-לֹא דְרַשְׁנֻהוּ כַּמִּשְׁפָּט.

יד וַיִּתְקַדְּשׁוּ, הַכֹּהֲנִים וְהַלְוִיִּם, לְהַעֲלוֹת, אֶת-אֲרוֹן יְהוָה אֱלֹהֵי יִשְׂרָאֵל.

טו וַיִּשְׂאוּ בְנֵי-הַלְוִיִּם, אֵת אֲרוֹן הָאֱלֹהִים, כַּאֲשֶׁר צִוָּה מֹשֶׁה, כִּדְבַר יְהוָה–בִּכְתֵפָם בַּמֹּטוֹת, עֲלֵיהֶם.  {פ}

טז וַיֹּאמֶר דָּוִיד, לְשָׂרֵי הַלְוִיִּם, לְהַעֲמִיד אֶת-אֲחֵיהֶם הַמְשֹׁרְרִים, בִּכְלֵי-שִׁיר נְבָלִים וְכִנֹּרוֹת וּמְצִלְתָּיִם–מַשְׁמִיעִים לְהָרִים-בְּקוֹל, לְשִׂמְחָה.  {פ}

יז וַיַּעֲמִידוּ הַלְוִיִּם, אֵת הֵימָן בֶּן-יוֹאֵל, וּמִן-אֶחָיו, אָסָף בֶּן-בֶּרֶכְיָהוּ;  {ס}  וּמִן-בְּנֵי מְרָרִי אֲחֵיהֶם, אֵיתָן בֶּן-קוּשָׁיָהוּ.

יח וְעִמָּהֶם, אֲחֵיהֶם הַמִּשְׁנִים:  זְכַרְיָהוּ בֵּן וְיַעֲזִיאֵל וּשְׁמִירָמוֹת וִיחִיאֵל וְעֻנִּי אֱלִיאָב וּבְנָיָהוּ וּמַעֲשֵׂיָהוּ וּמַתִּתְיָהוּ וֶאֱלִיפְלֵהוּ וּמִקְנֵיָהוּ וְעֹבֵד אֱדֹם, וִיעִיאֵל–הַשֹּׁעֲרִים.

יט וְהַמְשֹׁרְרִים, הֵימָן אָסָף וְאֵיתָן–בִּמְצִלְתַּיִם נְחֹשֶׁת, לְהַשְׁמִיעַ.

כ וּזְכַרְיָה וַעֲזִיאֵל וּשְׁמִירָמוֹת וִיחִיאֵל, וְעֻנִּי וֶאֱלִיאָב, וּמַעֲשֵׂיָהוּ, וּבְנָיָהוּ–בִּנְבָלִים, עַל-עֲלָמוֹת.

כא וּמַתִּתְיָהוּ וֶאֱלִיפְלֵהוּ, וּמִקְנֵיָהוּ וְעֹבֵד אֱדֹם, וִיעִיאֵל, וַעֲזַזְיָהוּ–בְּכִנֹּרוֹת עַל-הַשְּׁמִינִית, לְנַצֵּחַ.

Podcast: Play in new window | Download (Duration: 55:32 — 19.1MB)

Subscribe: Email | RSS

א וַיִּשְׁלַח חירם (חוּרָם) מֶלֶךְ-צֹר מַלְאָכִים, אֶל-דָּוִיד, וַעֲצֵי אֲרָזִים, וְחָרָשֵׁי קִיר וְחָרָשֵׁי עֵצִים–לִבְנוֹת לוֹ, בָּיִת.

ב וַיֵּדַע דָּוִיד, כִּי-הֱכִינוֹ יְהוָה לְמֶלֶךְ עַל-יִשְׂרָאֵל:  כִּי-נִשֵּׂאת לְמַעְלָה מַלְכוּתוֹ, בַּעֲבוּר עַמּוֹ יִשְׂרָאֵל.  {ס}

ג וַיִּקַּח דָּוִיד עוֹד נָשִׁים, בִּירוּשָׁלִָם; וַיּוֹלֶד דָּוִיד עוֹד, בָּנִים וּבָנוֹת.

ד וְאֵלֶּה שְׁמוֹת הַיְלוּדִים, אֲשֶׁר הָיוּ-לוֹ בִּירוּשָׁלִָם:  שַׁמּוּעַ וְשׁוֹבָב, נָתָן וּשְׁלֹמֹה.

ה וְיִבְחָר וֶאֱלִישׁוּעַ, וְאֶלְפָּלֶט.

ו וְנֹגַהּ וְנֶפֶג, וְיָפִיעַ.

ז וֶאֱלִישָׁמָע וּבְעֶלְיָדָע, וֶאֱלִיפָלֶט.  {פ}

ח וַיִּשְׁמְעוּ פְלִשְׁתִּים, כִּי-נִמְשַׁח דָּוִיד לְמֶלֶךְ עַל-כָּל-יִשְׂרָאֵל, וַיַּעֲלוּ כָל-פְּלִשְׁתִּים, לְבַקֵּשׁ אֶת-דָּוִיד; וַיִּשְׁמַע דָּוִיד, וַיֵּצֵא לִפְנֵיהֶם.

ט וּפְלִשְׁתִּים, בָּאוּ; וַיִּפְשְׁטוּ, בְּעֵמֶק רְפָאִים.

י וַיִּשְׁאַל דָּוִיד בֵּאלֹהִים, לֵאמֹר–הַאֶעֱלֶה עַל-פלשתיים (פְּלִשְׁתִּים), וּנְתַתָּם בְּיָדִי; וַיֹּאמֶר לוֹ יְהוָה עֲלֵה, וּנְתַתִּים בְּיָדֶךָ.

יא וַיַּעֲלוּ בְּבַעַל-פְּרָצִים, וַיַּכֵּם שָׁם דָּוִיד, וַיֹּאמֶר דָּוִיד, פָּרַץ הָאֱלֹהִים אֶת-אוֹיְבַי בְּיָדִי כְּפֶרֶץ מָיִם; עַל-כֵּן, קָרְאוּ שֵׁם-הַמָּקוֹם הַהוּא–בַּעַל פְּרָצִים.

יב וַיַּעַזְבוּ שָׁם, אֶת-אֱלֹהֵיהֶם; וַיֹּאמֶר דָּוִיד, וַיִּשָּׂרְפוּ בָּאֵשׁ.  {פ}

יג וַיֹּסִיפוּ עוֹד פְּלִשְׁתִּים, וַיִּפְשְׁטוּ בָּעֵמֶק.

יד וַיִּשְׁאַל עוֹד דָּוִיד, בֵּאלֹהִים, וַיֹּאמֶר לוֹ הָאֱלֹהִים, לֹא תַעֲלֶה אַחֲרֵיהֶם:  הָסֵב, מֵעֲלֵיהֶם, וּבָאתָ לָהֶם, מִמּוּל הַבְּכָאִים.

טו וִיהִי כְּשָׁמְעֲךָ אֶת-קוֹל הַצְּעָדָה, בְּרָאשֵׁי הַבְּכָאִים–אָז, תֵּצֵא בַמִּלְחָמָה:  כִּי-יָצָא הָאֱלֹהִים לְפָנֶיךָ, לְהַכּוֹת אֶת-מַחֲנֵה פְלִשְׁתִּים.

טז וַיַּעַשׂ דָּוִיד, כַּאֲשֶׁר צִוָּהוּ הָאֱלֹהִים; וַיַּכּוּ אֶת-מַחֲנֵה פְלִשְׁתִּים, מִגִּבְעוֹן וְעַד-גָּזְרָה.

יז וַיֵּצֵא שֵׁם-דָּוִיד, בְּכָל-הָאֲרָצוֹת; וַיהוָה נָתַן אֶת-פַּחְדּוֹ, עַל-כָּל-הַגּוֹיִם.

Podcast: Play in new window | Download (Duration: 56:59 — 19.6MB)

Subscribe: Email | RSS

ח וְדָוִיד וְכָל-יִשְׂרָאֵל, מְשַׂחֲקִים לִפְנֵי הָאֱלֹהִים–בְּכָל-עֹז; וּבְשִׁירִים וּבְכִנֹּרוֹת וּבִנְבָלִים וּבְתֻפִּים, וּבִמְצִלְתַּיִם וּבַחֲצֹצְרוֹת.

ט וַיָּבֹאוּ, עַד-גֹּרֶן כִּידֹן; וַיִּשְׁלַח עֻזָּא אֶת-יָדוֹ, לֶאֱחֹז אֶת-הָאָרוֹן–כִּי שָׁמְטוּ, הַבָּקָר.

י וַיִּחַר-אַף יְהוָה, בְּעֻזָּא, וַיַּכֵּהוּ, עַל אֲשֶׁר-שָׁלַח יָדוֹ עַל-הָאָרוֹן; וַיָּמָת שָׁם, לִפְנֵי אֱלֹהִים.

יא וַיִּחַר לְדָוִיד, כִּי-פָרַץ יְהוָה פֶּרֶץ בְּעֻזָּא; וַיִּקְרָא לַמָּקוֹם הַהוּא, פֶּרֶץ עֻזָּא, עַד, הַיּוֹם הַזֶּה.

יב וַיִּירָא דָוִיד אֶת-הָאֱלֹהִים, בַּיּוֹם הַהוּא לֵאמֹר:  הֵיךְ אָבִיא אֵלַי, אֵת אֲרוֹן הָאֱלֹהִים.

יג וְלֹא-הֵסִיר דָּוִיד אֶת-הָאָרוֹן אֵלָיו, אֶל-עִיר דָּוִיד; וַיַּטֵּהוּ, אֶל-בֵּית עֹבֵד-אֱדֹם הַגִּתִּי.

יד וַיֵּשֶׁב אֲרוֹן הָאֱלֹהִים עִם-בֵּית עֹבֵד אֱדֹם, בְּבֵיתוֹ–שְׁלֹשָׁה חֳדָשִׁים; וַיְבָרֶךְ יְהוָה אֶת-בֵּית עֹבֵד-אֱדֹם, וְאֶת-כָּל-אֲשֶׁר-לוֹ.  {ס}

Podcast: Play in new window | Download (Duration: 56:20 — 19.3MB)

Subscribe: Email | RSS

Podcast: Play in new window | Download (Duration: 1:05:25 — 22.5MB)

Subscribe: Email | RSS

לג וּמִבְּנֵי יִשָּׂשכָר, יוֹדְעֵי בִינָה לַעִתִּים, לָדַעַת, מַה-יַּעֲשֶׂה יִשְׂרָאֵל–רָאשֵׁיהֶם מָאתַיִם, וְכָל-אֲחֵיהֶם עַל-פִּיהֶם.  {ס}

לד מִזְּבֻלוּן יוֹצְאֵי צָבָא, עֹרְכֵי מִלְחָמָה בְּכָל-כְּלֵי מִלְחָמָה–חֲמִשִּׁים אָלֶף:  וְלַעֲדֹר, בְּלֹא-לֵב וָלֵב.  {ס}

לה וּמִנַּפְתָּלִי, שָׂרִים אָלֶף; וְעִמָּהֶם בְּצִנָּה וַחֲנִית, שְׁלֹשִׁים וְשִׁבְעָה אָלֶף.  {ס}

לו וּמִן-הַדָּנִי עֹרְכֵי מִלְחָמָה, עֶשְׂרִים-וּשְׁמוֹנָה אֶלֶף וְשֵׁשׁ מֵאוֹת.  {ס}

לז וּמֵאָשֵׁר, יוֹצְאֵי צָבָא לַעֲרֹךְ מִלְחָמָה–אַרְבָּעִים אָלֶף.  {ס}

לח וּמֵעֵבֶר לַיַּרְדֵּן מִן-הָראוּבֵנִי וְהַגָּדִי וַחֲצִי שֵׁבֶט מְנַשֶּׁה, בְּכֹל כְּלֵי צְבָא מִלְחָמָה–מֵאָה וְעֶשְׂרִים, אָלֶף.  {ס}

לט כָּל-אֵלֶּה אַנְשֵׁי מִלְחָמָה, עֹדְרֵי מַעֲרָכָה, בְּלֵבָב שָׁלֵם בָּאוּ חֶבְרוֹנָה, לְהַמְלִיךְ אֶת-דָּוִיד עַל-כָּל-יִשְׂרָאֵל; וְגַם כָּל-שֵׁרִית יִשְׂרָאֵל, לֵב אֶחָד–לְהַמְלִיךְ אֶת-דָּוִיד.

מ וַיִּהְיוּ-שָׁם עִם-דָּוִיד יָמִים שְׁלוֹשָׁה, אֹכְלִים וְשׁוֹתִים:  כִּי-הֵכִינוּ לָהֶם, אֲחֵיהֶם.

מא וְגַם הַקְּרוֹבִים-אֲלֵיהֶם עַד-יִשָּׂשכָר וּזְבֻלוּן וְנַפְתָּלִי, מְבִיאִים לֶחֶם בַּחֲמוֹרִים וּבַגְּמַלִּים וּבַפְּרָדִים וּבַבָּקָר מַאֲכָל קֶמַח דְּבֵלִים וְצִמּוּקִים וְיַיִן-וְשֶׁמֶן וּבָקָר וְצֹאן–לָרֹב:  כִּי שִׂמְחָה, בְּיִשְׂרָאֵל.  {פ}

Podcast: Play in new window | Download (Duration: 52:21 — 18.0MB)

Subscribe: Email | RSS

כד וְאֵלֶּה מִסְפְּרֵי רָאשֵׁי הֶחָלוּץ, לַצָּבָא, בָּאוּ עַל-דָּוִיד, חֶבְרוֹנָה:  לְהָסֵב מַלְכוּת שָׁאוּל, אֵלָיו–כְּפִי יְהוָה.  {ס}

כה בְּנֵי יְהוּדָה, נֹשְׂאֵי צִנָּה וָרֹמַח–שֵׁשֶׁת אֲלָפִים וּשְׁמוֹנֶה מֵאוֹת, חֲלוּצֵי צָבָא.  {ס}

כו מִן-בְּנֵי שִׁמְעוֹן, גִּבּוֹרֵי חַיִל לַצָּבָא–שִׁבְעַת אֲלָפִים, וּמֵאָה.  {ס}

כז מִן-בְּנֵי, הַלֵּוִי–אַרְבַּעַת אֲלָפִים, וְשֵׁשׁ מֵאוֹת.  {ס}

כח וִיהוֹיָדָע, הַנָּגִיד לְאַהֲרֹן; וְעִמּוֹ, שְׁלֹשֶׁת אֲלָפִים וּשְׁבַע מֵאוֹת.  {ס}

כט וְצָדוֹק נַעַר, גִּבּוֹר חָיִל; וּבֵית-אָבִיו שָׂרִים, עֶשְׂרִים וּשְׁנָיִם.  {ס}

ל וּמִן-בְּנֵי בִנְיָמִן אֲחֵי שָׁאוּל, שְׁלֹשֶׁת אֲלָפִים; וְעַד-הֵנָּה, מַרְבִּיתָם, שֹׁמְרִים, מִשְׁמֶרֶת בֵּית שָׁאוּל.  {ס}

לא וּמִן-בְּנֵי אֶפְרַיִם, עֶשְׂרִים אֶלֶף וּשְׁמוֹנֶה מֵאוֹת–גִּבּוֹרֵי חַיִל, אַנְשֵׁי שֵׁמוֹת לְבֵית אֲבוֹתָם.  {ס}

לב וּמֵחֲצִי מַטֵּה מְנַשֶּׁה, שְׁמוֹנָה עָשָׂר אָלֶף, אֲשֶׁר נִקְּבוּ בְּשֵׁמוֹת, לָבוֹא לְהַמְלִיךְ אֶת-דָּוִיד.  {ס}

Podcast: Play in new window | Download (Duration: 52:12 — 17.9MB)

Subscribe: Email | RSS

יט וְרוּחַ לָבְשָׁה, אֶת-עֲמָשַׂי רֹאשׁ השלושים (הַשָּׁלִישִׁים), לְךָ דָוִיד וְעִמְּךָ בֶן-יִשַׁי, שָׁלוֹם שָׁלוֹם לְךָ וְשָׁלוֹם לְעֹזְרֶךָ כִּי עֲזָרְךָ אֱלֹהֶיךָ; וַיְקַבְּלֵם דָּוִיד, וַיִּתְּנֵם בְּרָאשֵׁי הַגְּדוּד.  {פ}

כ וּמִמְּנַשֶּׁה נָפְלוּ עַל-דָּוִיד, בְּבֹאוֹ עִם-פְּלִשְׁתִּים עַל-שָׁאוּל לַמִּלְחָמָה–וְלֹא עֲזָרֻם:  כִּי בְעֵצָה, שִׁלְּחֻהוּ סַרְנֵי פְלִשְׁתִּים לֵאמֹר, בְּרָאשֵׁינוּ, יִפּוֹל אֶל-אֲדֹנָיו שָׁאוּל.

כא בְּלֶכְתּוֹ אֶל-צִיקְלַג, נָפְלוּ עָלָיו מִמְּנַשֶּׁה עַדְנַח וְיוֹזָבָד וִידִיעֲאֵל וּמִיכָאֵל וְיוֹזָבָד, וֶאֱלִיהוּא, וְצִלְּתָי:  רָאשֵׁי הָאֲלָפִים, אֲשֶׁר לִמְנַשֶּׁה.

כב וְהֵמָּה, עָזְרוּ עִם-דָּוִיד עַל-הַגְּדוּד, כִּי-גִבּוֹרֵי חַיִל, כֻּלָּם; וַיִּהְיוּ שָׂרִים, בַּצָּבָא.

כג כִּי לְעֶת-יוֹם בְּיוֹם, יָבֹאוּ עַל-דָּוִיד לְעָזְרוֹ–עַד-לְמַחֲנֶה גָדוֹל, כְּמַחֲנֵה אֱלֹהִים.  {פ}

Podcast: Play in new window | Download (Duration: 53:04 — 24.3MB)

Subscribe: Email | RSS

א וְאֵלֶּה, הַבָּאִים אֶל-דָּוִיד לְצִיקְלַג, עוֹד עָצוּר, מִפְּנֵי שָׁאוּל בֶּן-קִישׁ; וְהֵמָּה, בַּגִּבּוֹרִים, עֹזְרֵי, הַמִּלְחָמָה.

ב נֹשְׁקֵי קֶשֶׁת, מַיְמִינִים וּמַשְׂמִאלִים בָּאֲבָנִים, וּבַחִצִּים, בַּקָּשֶׁת–מֵאֲחֵי שָׁאוּל, מִבִּנְיָמִן.

ג הָרֹאשׁ אֲחִיעֶזֶר וְיוֹאָשׁ, בְּנֵי הַשְּׁמָעָה הַגִּבְעָתִי, ויזואל (וִיזִיאֵל) וָפֶלֶט, בְּנֵי עַזְמָוֶת; וּבְרָכָה, וְיֵהוּא הָעַנְּתֹתִי.

ד וְיִשְׁמַעְיָה הַגִּבְעוֹנִי גִּבּוֹר בַּשְּׁלֹשִׁים, וְעַל-הַשְּׁלֹשִׁים.

ה וְיִרְמְיָה וְיַחֲזִיאֵל וְיוֹחָנָן, וְיוֹזָבָד הַגְּדֵרָתִי.  {ס}

ו אֶלְעוּזַי וִירִימוֹת וּבְעַלְיָה וּשְׁמַרְיָהוּ, וּשְׁפַטְיָהוּ החריפי (הַחֲרוּפִי).

ז אֶלְקָנָה וְיִשִּׁיָּהוּ וַעֲזַרְאֵל וְיוֹעֶזֶר, וְיָשָׁבְעָם–הַקָּרְחִים.

ח וְיוֹעֵאלָה וּזְבַדְיָה בְּנֵי יְרֹחָם, מִן-הַגְּדוֹר.

ט וּמִן-הַגָּדִי נִבְדְּלוּ אֶל-דָּוִיד לַמְצַד מִדְבָּרָה גִּבֹּרֵי הַחַיִל, אַנְשֵׁי צָבָא לַמִּלְחָמָה–עֹרְכֵי צִנָּה, וָרֹמַח; וּפְנֵי אַרְיֵה פְּנֵיהֶם, וְכִצְבָאיִם עַל-הֶהָרִים לְמַהֵר.

י עֵזֶר, הָרֹאשׁ; עֹבַדְיָה, הַשֵּׁנִי, אֱלִיאָב, הַשְּׁלִשִׁי.

יא מִשְׁמַנָּה, הָרְבִיעִי, יִרְמְיָה, הַחֲמִשִׁי.

יב עַתַּי, הַשִּׁשִּׁי, אֱלִיאֵל, הַשְּׁבִעִי.

יג יוֹחָנָן, הַשְּׁמִינִי, אֶלְזָבָד, הַתְּשִׁיעִי.

יד יִרְמְיָהוּ, הָעֲשִׂירִי, מַכְבַּנַּי, עַשְׁתֵּי עָשָׂר.  {ס}

טו אֵלֶּה מִבְּנֵי-גָד, רָאשֵׁי הַצָּבָא; אֶחָד לְמֵאָה הַקָּטָן, וְהַגָּדוֹל לְאָלֶף.

טז אֵלֶּה הֵם, אֲשֶׁר עָבְרוּ אֶת-הַיַּרְדֵּן בַּחֹדֶשׁ הָרִאשׁוֹן, וְהוּא מְמַלֵּא, עַל-כָּל-גדיתיו (גְּדוֹתָיו); וַיַּבְרִיחוּ, אֶת-כָּל-הָעֲמָקִים, לַמִּזְרָח, וְלַמַּעֲרָב.  {פ}

יז וַיָּבֹאוּ, מִן-בְּנֵי בִנְיָמִן וִיהוּדָה, עַד-לַמְצָד, לְדָוִיד.

יח וַיֵּצֵא דָוִיד, לִפְנֵיהֶם, וַיַּעַן וַיֹּאמֶר לָהֶם, אִם-לְשָׁלוֹם בָּאתֶם אֵלַי לְעָזְרֵנִי יִהְיֶה-לִּי עֲלֵיכֶם לֵבָב לְיָחַד; וְאִם-לְרַמּוֹתַנִי לְצָרַי, בְּלֹא חָמָס בְּכַפַּי, יֵרֶא אֱלֹהֵי אֲבוֹתֵינוּ, וְיוֹכַח.  {ס}

Podcast: Play in new window | Download (Duration: 55:49 — 25.5MB)

Subscribe: Email | RSS

כב בְּנָיָה בֶן-יְהוֹיָדָע בֶּן-אִישׁ-חַיִל רַב-פְּעָלִים, מִן-קַבְצְאֵל; הוּא הִכָּה, אֵת שְׁנֵי אֲרִיאֵל מוֹאָב, וְהוּא יָרַד וְהִכָּה אֶת-הָאֲרִי בְּתוֹךְ הַבּוֹר, בְּיוֹם הַשָּׁלֶג.

כג וְהוּא-הִכָּה אֶת-הָאִישׁ הַמִּצְרִי אִישׁ מִדָּה חָמֵשׁ בָּאַמָּה, וּבְיַד הַמִּצְרִי חֲנִית כִּמְנוֹר אֹרְגִים, וַיֵּרֶד אֵלָיו, בַּשָּׁבֶט; וַיִּגְזֹל אֶת-הַחֲנִית מִיַּד הַמִּצְרִי, וַיַּהַרְגֵהוּ בַּחֲנִיתוֹ.

כד אֵלֶּה עָשָׂה, בְּנָיָהוּ בֶּן-יְהוֹיָדָע; וְלוֹ-שֵׁם, בִּשְׁלוֹשָׁה הַגִּבֹּרִים.

כה מִן-הַשְּׁלוֹשִׁים, הִנּוֹ נִכְבָּד הוּא, וְאֶל-הַשְּׁלֹשָׁה, לֹא-בָא; וַיְשִׂימֵהוּ דָוִיד, עַל-מִשְׁמַעְתּוֹ.  {ס}

כו וְגִבּוֹרֵי, הַחֲיָלִים:  עֲשָׂהאֵל  {ר} אֲחִי יוֹאָב,  {ס}  אֶלְחָנָן בֶּן-דּוֹדוֹ מִבֵּית לָחֶם.  {ס}

כז שַׁמּוֹת,  {ר} הַהֲרוֹרִי,  {ס}  חֶלֶץ, הַפְּלוֹנִי.  {ס}

כח עִירָא בֶן-עִקֵּשׁ  {ר} הַתְּקוֹעִי,  {ס}  אֲבִיעֶזֶר הָעַנְּתוֹתִי.  {ס}

כט סִבְּכַי,  {ר} הַחֻשָׁתִי,  {ס}  עִילַי, הָאֲחוֹחִי.  {ס}

ל מַהְרַי,  {ר} הַנְּטֹפָתִי,  {ס}  חֵלֶד בֶּן-בַּעֲנָה, הַנְּטוֹפָתִי.  {ס}

לא אִיתַי  {ר} בֶּן-רִיבַי, מִגִּבְעַת בְּנֵי בִנְיָמִן,  {ס}  בְּנָיָה, הַפִּרְעָתֹנִי.  {ס}

לב חוּרַי  {ר} מִנַּחֲלֵי גָעַשׁ,  {ס}  אֲבִיאֵל הָעַרְבָתִי.  {ס}

לג עַזְמָוֶת,  {ר} הַבַּחֲרוּמִי,  {ס}  אֶלְיַחְבָּא, הַשַּׁעַלְבֹנִי.  {ס}

לד בְּנֵי, הָשֵׁם  {ר} הַגִּזוֹנִי,  {ס}  יוֹנָתָן בֶּן-שָׁגֵה, הַהֲרָרִי.  {ס}

לה אֲחִיאָם  {ר} בֶּן-שָׂכָר הַהֲרָרִי,  {ס}  אֱלִיפַל בֶּן-אוּר.  {ס}

לו חֵפֶר, הַמְּכֵרָתִי,  {ר} אֲחִיָּה, הַפְּלֹנִי.  {ס}

לז חֶצְרוֹ, הַכַּרְמְלִי,  {ס}  נַעֲרַי,  {ר} בֶּן-אֶזְבָּי.  {ס}

לח יוֹאֵל אֲחִי נָתָן,  {ס}  מִבְחָר בֶּן-  {ר} הַגְרִי.  {ס}

לט צֶלֶק, הָעַמּוֹנִי; נַחְרַי, הַבֵּרֹתִי, נֹשֵׂא, כְּלֵי יוֹאָב בֶּן-  {ר} צְרוּיָה.  {ס}

מ עִירָא, הַיִּתְרִי,  {ס}  גָּרֵב, הַיִּתְרִי.  {ס}

מא אוּרִיָּה,  {ר} הַחִתִּי,  {ס}  זָבָד, בֶּן-אַחְלָי.  {ס}

מב עֲדִינָא בֶן-שִׁיזָא הָראוּבֵנִי,  {ר} רֹאשׁ לָראוּבֵנִי–וְעָלָיו שְׁלֹשִׁים.  {ס}

מג חָנָן, בֶּן-מַעֲכָה, וְיוֹשָׁפָט,  {ר} הַמִּתְנִי.  {ס}

מד עֻזִּיָּא, הָעַשְׁתְּרָתִי;  {ס}  שָׁמָע, ויעואל (וִיעִיאֵל),  {ר} בְּנֵי, חוֹתָם הָעֲרֹעֵרִי.  {ס}

מה יְדִיעֲאֵל, בֶּן-שִׁמְרִי, וְיֹחָא אָחִיו,  {ר} הַתִּיצִי.  {ס}

מו אֱלִיאֵל, הַמַּחֲוִים, וִירִיבַי וְיוֹשַׁוְיָה, בְּנֵי אֶלְנָעַם;  {ס}  וְיִתְמָה,  {ר}
הַמּוֹאָבִי.

מז אֱלִיאֵל וְעוֹבֵד,  {ס}  וְיַעֲשִׂיאֵל הַמְּצֹבָיָה.  {פ}

Podcast: Play in new window | Download (Duration: 54:12 — 12.4MB)

Subscribe: Email | RSS

יב וְאַחֲרָיו אֶלְעָזָר בֶּן-דּוֹדוֹ, הָאֲחוֹחִי; הוּא, בִּשְׁלוֹשָׁה הַגִּבֹּרִים.

יג הוּא-הָיָה עִם-דָּוִיד בַּפַּס דַּמִּים, וְהַפְּלִשְׁתִּים נֶאֶסְפוּ-שָׁם לַמִּלְחָמָה, וַתְּהִי חֶלְקַת הַשָּׂדֶה, מְלֵאָה שְׂעוֹרִים; וְהָעָם נָסוּ, מִפְּנֵי פְלִשְׁתִּים.

יד וַיִּתְיַצְּבוּ בְתוֹךְ-הַחֶלְקָה וַיַּצִּילוּהָ, וַיַּכּוּ אֶת-פְּלִשְׁתִּים; וַיּוֹשַׁע יְהוָה, תְּשׁוּעָה גְדוֹלָה.

טו וַיֵּרְדוּ שְׁלוֹשָׁה מִן-הַשְּׁלוֹשִׁים רֹאשׁ עַל-הַצֻּר, אֶל-דָּוִיד–אֶל-מְעָרַת, עֲדֻלָּם; וּמַחֲנֵה פְלִשְׁתִּים, חֹנָה בְּעֵמֶק רְפָאִים.

טז וְדָוִיד, אָז בַּמְּצוּדָה; וּנְצִיב פְּלִשְׁתִּים, אָז בְּבֵית לָחֶם.

יז וַיִּתְאָו דָּוִיד, וַיֹּאמַר:  מִי יַשְׁקֵנִי מַיִם, מִבּוֹר בֵּית-לֶחֶם אֲשֶׁר בַּשָּׁעַר.

יח וַיִּבְקְעוּ הַשְּׁלֹשָׁה בְּמַחֲנֵה פְלִשְׁתִּים, וַיִּשְׁאֲבוּ-מַיִם מִבּוֹר בֵּית-לֶחֶם אֲשֶׁר בַּשַּׁעַר, וַיִּשְׂאוּ, וַיָּבִאוּ אֶל-דָּוִיד; וְלֹא-אָבָה דָוִיד לִשְׁתּוֹתָם, וַיְנַסֵּךְ אֹתָם לַיהוָה.

יט וַיֹּאמֶר חָלִילָה לִּי מֵאֱלֹהַי מֵעֲשׂוֹת זֹאת, הֲדַם הָאֲנָשִׁים הָאֵלֶּה אֶשְׁתֶּה בְנַפְשׁוֹתָם כִּי בְנַפְשׁוֹתָם הֱבִיאוּם, וְלֹא אָבָה, לִשְׁתּוֹתָם; אֵלֶּה עָשׂוּ, שְׁלֹשֶׁת הַגִּבּוֹרִים.

כ וְאַבְשַׁי אֲחִי-יוֹאָב, הוּא הָיָה רֹאשׁ הַשְּׁלוֹשָׁה, וְהוּא עוֹרֵר אֶת-חֲנִיתוֹ, עַל-שְׁלֹשׁ מֵאוֹת חָלָל; ולא- (וְלוֹ-) שֵׁם, בַּשְּׁלוֹשָׁה.

כא מִן-הַשְּׁלוֹשָׁה בַשְּׁנַיִם נִכְבָּד, וַיְהִי לָהֶם לְשָׂר; וְעַד-הַשְּׁלוֹשָׁה, לֹא-בָא.  {ס}